आदिइत्यादिको प्रस्तुति तथा गजुरी गाउँपालिकाको आयोजना ‘सुझबुझ’

काठमाडौँ । धादिङको गजुरी गाउँपालिकामा सडक नाटक ‘सुझबुझ’ देखाइएको छ । गजुरी गाउँपालिका धादिङको आयोजना तथा नाट्य संस्था ’आदिइत्यादि’ को प्रस्तुतिमा मञ्चन गरिएको हुन उक्त नाटकको लेखन तथा निर्देशन रङ्गकर्मी पुरु लम्सालले गरेका हुन ।
आधुनिक प्रविधि र सामाजिक सञ्जालको गलत प्रयोगका कारण निम्तिने विभिन्न जोखिमहरूका बारेमा नाटक मार्फत सचेत गराइएको छ । यसका साथै पछिल्लो समय व्यस्तताका कारण अभिभावकहरूले आफ्ना बालबालिकाहरूलाई पर्याप्त समय नदिँदा उनीहरूको मनोविज्ञान र भविष्यमा कस्तो नकारात्मक परिणाम निस्कन्छ भन्ने कुरालाई पनि नाटकमा बडो मार्मिक ढंगले देखाइएको छ । नाटकले विशेष गरी युवा पुस्तामा बढ्दो लागुपदार्थको दुव्र्यसनी र यसले समाजमा पारेको गम्भीर असरका कुराहरुलाई दर्शाउछ । समाजमा अझै पनि चुनौतीका रूपमा रहेको बालविवाह र यसले समाजमा पार्ने बहुआयामिक प्रभावलाई समेत नाटकको मुख्य विषयवस्तु हो ।
सामाजिक रूपान्तरण र जनचेतना अभिवृद्धिका लागि अत्यन्तै प्रभावकारी हुने अपेक्षा गरिएको नाटकमा दिवाकार घिमीरे, सागर कार्की दीपमाला परियार, सेविता अधिकारी अञ्जु खड्का र रुबिन सुनुवारको अभिनय, संवाद र प्रस्तुति निकै प्रभावकारी छ । नाटकभित्र पुरु लम्सालको लेखन तथा निर्देशकीय पक्षलाई हेर्दा सामाजिक यथार्थ, मानवीय सम्बन्ध र समकालीन समस्यालाई कलात्मक ढंगले प्रस्तुत गर्ने विशेषता देखिन्छ ।