काठमाडौं । आश्विन ३१, श्वेत गंगा हाइड्रोपावर एण्ड कन्स्ट्रक्सन लिमिटेडको नवौं वार्षिक साधारण सभा शुक्रबार राजधानीको सुकेधारास्थित सेलिब्रेसन हाईट्समा सम्पन्न भएको छ । सभा बिहान ११:०० बजे सुरु भई निर्धारित एजेण्डा अनुसार सम्पन्न भएको थियो ।
सभाको अध्यक्षता कम्पनीका अध्यक्ष अनुप कुमार उपाध्यायले गर्नु भएको थियो । सभामा सञ्चालक समितिको वार्षिक प्रतिवेदन प्रस्तुत गरी विस्तृत छलफल पश्चात सर्वसम्मत रूपमा पारित गरिएको छ । सो प्रतिवेदनमा गत आर्थिक वर्षमा कम्पनीले गरेका गतिविधिहरू, आगामी योजनाहरू र कम्पनीको समग्र प्रगतिको समीक्षा गरिएको थियो ।
त्यसैगरी लेखापरीक्षकको प्रतिवेदन सहित २०८२ साल आषाढ मसान्तसम्मको वासलात, आर्थिक वर्ष २०८१/८२ को नाफा(नोक्सान हिसाब, नगद प्रवाह विवरण र सोही अवधिको वार्षिक वित्तीय विवरणसँग सम्बन्धित सबै अनुसूचीहरू पनि सभाले छलफल गरी पारित गरेको छ । सभामा कम्पनीको वित्तीय अवस्था सुदृढ रहेको र आगामी वर्षमा ऊर्जा उत्पादन तथा निर्माण क्षेत्रमा थप लगानी विस्तार गर्ने योजना प्रस्तुत गरिएको जानकारी दिइयो ।
लेखापरीक्षण समितिको सिफारिस बमोजिम आर्थिक वर्ष २०८२/८३ का लागि लेखापरीक्षकको नियुक्ति र सोको पारिश्रमिक निर्धारण गर्ने प्रस्ताव पनि सर्वसम्मत रूपमा स्वीकृत गरिएको छ । साथै, कम्पनीको सुशासन र पारदर्शिता कायम राख्ने उद्देश्यले एक जना स्वतन्त्र सञ्चालकको नियुक्ति पनि गरिएको छ ।
यसैगरी, कम्पनीका शेयरधनीहरूको तर्फबाट प्रतिनिधित्व गर्ने चार जना सञ्चालकहरूको निर्वाचन पनि सम्पन्न भएको छ, जसमा एक जना महिला सञ्चालक समेत निर्वाचित भएकी छन् । नव–निर्वाचित सञ्चालकहरूले कम्पनीको व्यवस्थापन, पारदर्शिता र लगानी विस्तारमा सक्रिय भूमिका खेल्ने प्रतिबद्धता जनाएका छन् ।
कार्यक्रममा कम्पनीका प्रमुख कार्यकारी अधिकृतले हाइड्रोपावर उत्पादनमा हालसम्मका उपलब्धिहरू र आगामी वर्षका लक्ष्यहरूबारे जानकारी गराएका थिए । उनले कम्पनीले दक्ष जनशक्ति, प्रविधि र लगानी संयोजनमार्फत ऊर्जा क्षेत्रमा थप योगदान दिने विश्वास व्यक्त गरे ।
सभामा कम्पनीका शेयरधनी, सञ्चालक, लेखापरीक्षक, कर्मचारी तथा आमन्त्रित अतिथिहरूको उपस्थिती रहेको थियो । अन्त्यमा कम्पनीका अध्यक्ष अनुप कुमार उपाध्यायले सभामा सहभागिता जनाएका सबैप्रति धन्यवाद व्यक्त गर्दै आगामी दिनमा अझ प्रभावकारी र पारदर्शी ढंगले कम्पनीको कार्य सञ्चालन गर्ने प्रतिवद्धता जनाएका थिए ।
