काठमाडौं । संघीय संसद सचिवालयले दुई जना पत्रकारको संसद प्रवेश पास निलम्बन गरेको छ।
प्रधानमन्त्री केपी शर्मा ओलीलाई ‘तानाशाही प्रवृत्ति किन होला प्रधानमन्त्रीज्यू?’ भनेर प्रश्न सोधेको भन्दै संघीय संसदको महासचिवस्तरीय निर्णयबाट पत्रकारद्वय प्रकाश वली र किशोरकुमार श्रेष्ठको संसद प्रवेश पास निलम्बन गरिएको हो ।
संसद सचिवालयले पत्रकारलाई रिर्पोटिङका लागि प्रवेश पास उपलब्ध गराउने गर्दछ। वली र श्रेष्ठको पास एक महिनाका लागि निलम्बन गरिएको संसद सचिवालय स्रोतले जनाएको छ ।
पत्रकार आचारसंहिता पालन गर्नुपर्ने नियम उल्लघंन गरेकाले संसद सचिवालयको कार्ड एक महिनाका लागि निलम्बन गरिएको जनाइएको छ ।
गत फागुन ४ गते प्रतिनिधि सभाको बैठकबाट बाहिरिँदै गरेका प्रधानमन्त्री ओलीलाई दुईमध्येका एक पत्रकारले ‘ओली सरकार भ्रष्टाचारीलाई जोगाउन लागेको छ भन्ने आरोप छ नि प्रधानमन्त्रीज्यू,’ भन्ने प्रश्न गरेका थिए ।
