काठमाडौं । मंसीर ५ , सर्वोच्च अदालतको रिक्त न्यायाधीश पदमा नियुक्तिका लागि ६ जनाको नाम सिफारिश भएको छ ।
न्यायपरिषद्को मंगलवार बसेको बैठकले सर्वोच्च अदालतको न्यायाधीशमा उच्च अदालतका ४ न्यायाधीश र २ वरिष्ठ अधिवक्ताको नाम सिफारिश गरेको हो ।
बैठकले न्यायाधीशहरूतर्फबाट महेश शर्मा पौड्याल, सारङ्गा सुवेदी, टेकप्रसाद ढुंगाना र अब्दुल अजिज मुसलमान तथा कानून व्यवसायीतर्फबाट वरिष्ठ अधिवक्ताद्वय सुनिल पोखरेल र बालकृष्ण ढकाललाई सिफारिश गरेको न्याय परिषद्का सदस्य रामप्रसाद श्रेष्ठले लोकान्तरसँग बताए ।
पौड्याल उच्च अदालत पाटनका कामु मुख्य न्यायाधीश र ढुंगाना सोही अदालतका न्यायाधीश हुन् । मुसलमान उच्च अदालत पाटनको हेटौंडा इजलासका एक नम्बर न्यायाधीश हुन् । सुवेदी भने उच्च अदालत जनकपुरको कामु मुख्य न्यायाधीश छिन् ।
यता वरिष्ठ अधिवक्ता पोखरेल नेपाल बार एसोसिएसनका पूर्व महासचिव हुन् । उनले बार अध्यक्षमा समेत प्रतिस्पर्धा गरेका थिए ।
सर्वोच्चमा प्रधानन्यायाधीशसहित २१ जनाको दरबन्दी रहेकोमा हाल १४ जना मात्र कार्यरत छन् । ७ न्यायाधीश रिक्त रहे पनि ६ जनाको नाम मात्र सिफारिश गरिएको हो ।
