काठमाडौं । सरकारले वीर अस्पतालका ७ सय शैया विरामीका लागि नि:शुल्क उपलब्ध गराउने निर्णय गरेको छ ।
स्वास्थ्यमन्त्री मोहन बहादुर बस्नेतले वीर अस्पतालको क्याबिन बाहेकका सबै सात सयवटा शय्यालाई निःशुल्क गरिएको घोषणा गरेका छन् । यसअघि जेनरल बेडको दुई सय रुपैयाँ शुल्क लिने गरिएको थियो ।
स्वास्थ्यमन्त्री बस्नेतको निर्देशनमा चिकित्सा विज्ञान राष्ट्रिय प्रतिष्ठान (न्याम्स) को कार्यकारी परिषदले उक्त शैया निःशुल्क गरेको हो । स्वास्थ्य मन्त्री बस्नेत न्याम्सको सहकुलपति रहने व्यवस्था रहेको छ ।
जेनरल बेड निःशुल्क गरिए पनि वीरको क्याबिन तथा आईसीयुको शुल्क कायमै छ । जेनरल बेड निःशुल्क गरे पछि वार्षिक रुपमा ७ करोडको आर्थिक भार पर्ने औँल्याउदै वीरका निर्देशक डा.सन्तोष पौडेलले भने, ‘शनिबारदेखि जेनरल बेड निःशुल्क हुन्छ, मन्त्रालयले यसको लागि शोध भर्ना दिनेछ ।’
यसअघि वीरमा १० प्रतिशत शैया निःशुल्क थियो भने जेनरल बेडको लागि प्रति शैया प्रतिदिन २ सय सेवा शुल्क तिर्नुपग्र्याे ।
सरकारको सहयोगसँगै शल्यक्रिया लगायतको सेवा सुविधामा वृद्धि गरेर थप आय आर्जन गर्न सकिने जनाएको छ ।
वीरमा जम्मा ९ सय ५० शैया छन् । यस अन्तर्गत ७ सय जेनरल बेड र बाँकी रहेका २५० शैया आईसीयु, क्याबिन, एचडी, पोष्ट अपरेटिभ लगायतका हुन् ।
