काठमाडौं । रुस युक्रेन युद्धमा नेटो तथा यूरोपका सेनाले यूक्रेनलाई सहयोग सम्बन्धि अमेरिकी गोप्य दस्तावेज चुहाएको आरोपमा अमेरिकामा एकजना व्यक्ति गिरफ्तार परेका छन् ।
पक्राउ पर्नेमा अमेरिकी हवाई सेनाकै सदस्य २१ वर्षीय अमेरिकी एयर फोर्स न्याश्नल गार्ड ज्याक टेइसेइरा रहेका छन् ।
चुहाइएका दस्तावेजबाट अमेरिकाले संकलन गरेको गोप्य सूचनाहरू विश्वभर फैलिएपछि अमेरिका अहिले तनावमा छ । त्यतिमात्र नभएर दस्तावेजले किएभ र सोलसम्म अमेरिकाका सहयोगीलाई तर्साएको छ भने वासिङ्टनका समर्थकलाई सशङ्कित तुल्याएको छ ।
ती दस्तावेजमा अमेरिकाले आफ्ना मित्र र शत्रु सबैको जासुसी गरेको उल्लेख छ । गोप्य दस्तावेज चुहाएको आरोपमा अमेरिकी हवाई सेनाकै सदस्य २१ वर्षीय अमेरिकी एयर फोर्स न्याश्नल गार्ड ज्याक टेइसेइरा गिरफ्तारमा परेका छन् ।
सुरुवातमा अनलाइन च्याट ग्रुपमा अमेरिकी दस्तावेज सार्वजनिक गर्ने व्यक्ति उनी नै भएको अमेरिकी प्रहरीले बताएको छ । उनलाई जासुसीसम्बन्धी कानुनका आधारमा अभियोग चलाइनेछ जसले गोप्य रक्षा सूचना चुहाउनुलाई अपराधका रूपमा हेर्छ ।
