काठमाडाैं । सरकारले बैकुण्ठ अर्याललाई मुख्यसचिव नियुक्त गरेकाे छ । शंकरदास बैरागीलाई राजीनामा दिन लगाएर आज बिहान बसेकाे मन्त्रिपरिषद्काे बैठकले अर्याललाई मुख्यसचिव नियुक्त गरेकाे हाे ।
बैरागीलाई मन्त्रीस्तरीय सुविधा दिनेगरी राष्ट्रिय सुरक्षा परिषद्को सल्लाहकारमा नियुक्त गरिएकाे छ । अर्याल २ असारमा अनिवार्य अवकाश पाउँदै थिए । तर त्यसअघि नै उनलाई प्रचण्ड सरकारले मुख्यसचिव बनाएकाे हाे ।
बैरागी यसअघि पनि केपी ओली सरकारका पालामा सेटिङमै मुख्यसचिव बनेका थिए । त्यतिबेलाका मुख्यसचिव लोकदर्शन रेग्मीले स्वत: अवकाश पाएका भए धनबहादुर तामाङ मुख्यसचिव बन्ने थिए । तर अवकाशअघि नै रेग्मीले राजीनामा दिएपछि बैरागीलाई मुख्यसचिव बनाइएको थियो ।
मुख्यसचिवबाट राजीनामा दिएका रेग्मीलाई बेलायतका लागि राजदूत बनाइएको थियो । अहिले अर्याललाई मुख्यसचिव बनाउन एनसेललगायतका शक्ति केन्द्रले तीव्र लबिङ चलाएको स्रोतको दाबी छ ।
