काठमाडौं । ब्रिटेनमा आज राजा चार्ल्स तृतीयको राज्याभिषेक र राजमुकुट पहिरिने समारोह कार्यक्रम तय गरिएको छ । राजा चार्ल्सको क्वीन कन्सोर्ट कमिलाका साथ लन्डनस्थित एक प्रसिद्ध गिर्जाघर वेस्टमिन्स्टर एबीमा राज्याभिषेक हुदैछ ।
राजाले उक्त समारोह उनकी आमाको सन् १९५३ मा भएको यस अघिको राज्याभिषेकको तुलनामा सानो, छोटो र विविधतायुक्त होस् भन्ने चाहेका अन्तर्राष्ट्रिय सञ्चारमाध्यमले जनाएका छन् ।
उक्त समारोहका लागि करिब २,००० पाहुनालाई निम्तो पठाइसकिएको छ जनाइएको छ। धेरै समारोह जस्तै यसमा पनि परिवारले सबभन्दा महत्त्व पाउनेछ।
त्यसैले यसमा राजा चार्ल्स र क्वीन कन्सोर्ट कमिलाका परिवारहरू सहभागी हुनेछन् । रिपोर्टहरूका मुताबिक यूकेका पूर्व प्रधानमन्त्रीहरू लिज ट्रस र टोनी ब्लेयर पनि त्यहाँ हुनेछन्। त्यस्तै स्कटल्यान्डका प्रथम मन्त्री हम्जा युसुफ पनि त्यहाँ हुनेछन्।
फ्रान्सका राष्ट्रपति एमानुअल माक्रोँ समारोहमा सहभागी हुनेछन्। अमेरिकी राष्ट्रपति जो बाइडनले राजा चार्ल्सलाई एप्रिलमा भएको एक फोनवार्तामा उनी राज्याभिषेक समारोहमा सहभागी नहुने जनाइसकेका छन् तर अमेरिकी प्रथम महिला जिल बाइडेनले उनको प्रतिनिधित्व गर्ने निश्चित गरेका छन्।
पोल्यान्डका राष्ट्रपति एन्जे डुडा र अस्ट्रेलियाली प्रधानमन्त्री एन्थोनी अल्बानेजीले आफूहरू सहभागी हुने योजनामा रहेको बताएका स्थानीय रिपोर्टमा जनाइएको छ।
पाकिस्तानका प्रधानमन्त्री शहबाज शरिफ र फिलिपिन्सका राष्ट्रपति फर्डिनान्ड मार्कोस पनि सहभागी हुनेछन्।
राष्ट्रमण्डल समूहका प्रतिनिधि र धार्मिक नेताहरू पनि सहभागी हुने बुझिएको छ। विदेशी राजपरिवारका सदस्यहरू पनि समारोहमा सहभागी हुने भएका छन्।
