पर्यटन प्रर्वद्धनकालागि हिमाल गिरीको ” पिके” पुस्तक विमोचन

काठमाडौं । सोलुखुम्बु जिल्लामा पर्ने पर्यटकीय स्थल पिके हिल र पिके आसपासमा पर्ने महत्वपूर्ण पर्यटकीय क्षेत्रलाई प्रर्वद्धन गर्नकालागि मानवअधिकारकर्मी तथा लेखक हिमाल गिरीको पिके पुस्तकको एक समारोह विच विमोचन भएको छ ।
मुख्यतय पिके हिल र आसपासका क्षेत्र अन्तर्गत पर्ने पर्यटकीय गन्तव्यलाई उजागर गर्दै यस क्षेत्रमा वसोवास गर्ने शेर्पा समुदाय र इतिहास, धर्म,संस्कृति, भौगोलिक, जैविक विविधता र अवस्थितिलाई यस पुस्तकले एक अध्ययन दस्तावेजका रुपमा प्रस्तुत गरेको छ ।
कार्यक्रमका प्रमुख अतिथि लेखक तथा अन्वेशक कर्ण शाक्यले नेपाल हिमाल,पहाड र तराईको संगम भौगोलिक जैविकता भएको विश्वको प्रचुर पर्यटनको सम्भावनाको खानी भएको देश भएकाले नेपालको पर्यटन विकासमा पिके पुस्तकले सोलुखुम्वु क्षेत्रको पर्यटन प्रर्वद्धनमा सहयोगी भूमिका खेल्ने र यस्ता पर्यटकीय क्षेत्रलाई सरकाले नै संरक्षण र प्रर्वद्धन गर्नु पर्दछ भन्नु भयो ।
कार्यक्रममा पुस्तकको समिक्षा त्रिभुवन विश्वविद्यालयका प्राध्यापक डा. असोस्थामा भक्त खरेलले गर्नुभएको थियो भने पिके पुस्तकका लेखक हिमाल गिरीले पुस्तकका बारेमा प्रकाश पार्नु भएको थियो ।
उक्त कार्यक्रममा विभिन्न संघ सस्थाका विशिष्ट महानुभावका साथै नेपाल पर्यटन बोर्डका मिडिया कन्सल्टेन्ट टि.पी भुसालको उपस्थिति रहेको थियो भने कार्यक्रमको सभापतित्व पिक हिल सोशियल अर्गनाईजेशनका अध्यक्ष ङिमा देण्डी शेर्पाले गर्नु भएको थियो ।