काठमाडौं । नेकपा एमालेका सचिव टोपबहादुर रायमाझीविरुद्ध पक्राउ पुर्जी जारी भएपछि अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डसँग दुई पटक भेट गरिसकेका छन् । गत बिहीबार भेटेर यसै विषयमा छलफल गरेका ओलीले शनिबार पनि प्रधानमन्त्रीसँग भेट गरेका हुन् ।
शनिबार प्रधानमन्त्रीसँगको भेटपछि पत्रकारहरुले रायमाझी कहाँ छन् भनेर ओलीसँग जिज्ञासा राखेका थिए । ओलीले भने कहाँ छन् भन्ने आफूलाई जानकारी नभएको भन्दै पत्रकारहरुलाई जवाफ दिए, ‘तपाईहरु खोज्नुस् न ?’
नेपाली नागरिकलाई भुटानी शरणार्थी बनाएर विदेश पठाएको घटनामा गृह मन्त्रालयका तत्कालिन सचिव टेकनारायण पाण्डे, तत्कालिन गृहमन्त्री रामबहादुर थापा बादलका सल्लाहकार इन्द्रजित राई, एमाले सचिव रायमाझीका छोरा सन्दीपलगायतका व्यक्ति पक्राउ परिसकेका छन् ।
एमाले सचिव रायमाझी र एमाले उपाध्यक्ष तथा तत्कालिन गृहमन्त्री बादलका छोरा प्रतीकलगायतविरुद्ध प्रहरीको निवेदनमा जिल्ला अदालत काठमाडौंले पक्राउ पुर्जी जारी गरेको छ । पक्राउ पुर्जी जारी भएको दिन बुधबार अर्घाखाँचीमा एक कार्यक्रममा रहेका रायमाझी त्यसै दिन साँझदेखि सम्पर्कविहीन छन् ।
