बैशाख २८, सिन्धुली । कनपा ३ स्थित जलकन्या माविको ६२औं स्थापना दिवस तथा अभिभावक भेला सम्पन्न भएको छ । स्थापना दिवसका अवसरमा विद्यालयले विभिन्न कार्यक्रम आयोजना गरी मनाएको छ ।
उक्त अवसरमा कनपा ३ का स्थायी निवासी यमप्रसाद फुयाँलले स्वर्गीय बुबा तिर्थलाल फुयाँल र आमा चन्द्रकला फुयाँलको सम्मानमा ‘तिर्थ चन्द्र’ अक्षयकोष स्थापना गर्नुभएको छ । कोषका संरक्षक फुयाँलले कोष स्थापना गर्न १ लाख ९१ हजार रुपैयाँको चेक विद्यालयका प्रधानाध्यापक प्रेम आचार्यलाई हस्तान्तरण गर्नुभयो । निक्षेपको व्याजमार्फत आउने ७० प्रतिशत रकमबाट ८ कक्षामा सर्वोत्कृष्ट एकजना छात्र, एसईईमा सर्वोत्कृष्ट छात्रा वा छात्र मध्ये एकजना र बाह् कक्षामा सर्वोत्कृष्ट छात्रलाई प्रदान गरिने छ । बाँकी तीस प्रतिशत रकम कोषवृद्धि गरिने जनाइएको छ । योसहित विद्यालयमा स्थापना भएको अक्षयकोषको संख्या ९ पुगेको छ ।
यसैगरी कनपा तीन स्थित वडा कार्यालयले विद्यार्थीलाई न्यानो कपडा वितरण गरेकोे छ । वडा अध्यक्ष खड्गप्रसाद चौलागाइले बालकक्षादेखि कक्षा दशसम्मका विद्यार्थीलाई ट्य्राकस्युट तथा पोशाक वितरण गर्नुभएको थियो ।
कार्यक्रममा विद्यालय सञ्चालक समितिका सदस्य, अभिभावक तथा पूर्वविद्यार्थीको उपस्थिति रहेको थियो । विद्यालयमा अध्ययनरत विद्यार्थीहरुले सांस्कृतिक कार्यक्रम प्रस्तुत गरेका थिए ।
( सिन्धुलीबाट बलराम अधिकारीकाे सहयाेगमा )
