अनशनरत चिकित्सक डा गोविन्द केसीको स्वास्थ्य अवस्था जटिल हुदै गएको छ । स्वास्थ्य तथा शिक्षा क्षेत्र सुधारका लाथि अनशन बसेका डा.केसीको आज ८ औं दिनसम्म आइपुग्दा उनको स्वास्थ्य अवस्था नाजुक बनेको हो । सेती प्रादेशिक अस्पतालले अनशनरत डा. गोविन्द केसीलाई विशिष्टिकृत अस्पतालमा स्थानान्तरण गर्न भनेको छ ।
केसीको पेटमा अल्सर भई आन्तरिक रक्तश्राव भएको आशंका गर्दै अस्पतालले थप जटिलता बढ्न सक्ने भएकाले विशिष्टिकृत अस्पताल लैजान भनेको हो।
उनको शरीरमा मांशपेशी सुक्दै गएको र अल्सर भइ रक्तश्रावको शंका भएकाले ज्यानमा थप जटिलता आउनसक्ने र जोखिम हुनसक्ने भएकाले विशिष्टिकृत अस्पतालमा लैजान सल्लाह दिइएको उनको उपचारमा संलग्न डा. शेरबहादुर कमरले जानकारी दिए।
डा. केसीको स्वास्थ्य अवस्था नाजुक बन्दै गएको र थप जटिलता आउनसक्ने भएकाले उपचारका लागि बहुविशेषज्ञ भएको विशिष्टिकृत अस्पताल लैजान मानव अधिकार आयोगको सुदूरपश्चिम प्रदेश कार्यालय, प्रदेशको सामाजिक विकास मन्त्रालय, जिल्ला प्रशासन कार्यालय र संघीय स्वास्थ्य मन्त्रालयमा जानकारी पठाएको अस्पतालले जनाएको छ ।
डा. कमरका अनुसार डा. केसीमा पेट दुख्ने, दिसा कालो भएको, कमजोरी, टाउको दुख्ने, रिंगटा लाग्ने, थकान लाग्ने, सास फेर्न गाह्रो हुने, छाती दुख्ने, मांशपेशी बाउडिनेजस्ता समस्या देखिएका छन् । अनशनको आठौँ दिन सोमबारसम्म उनको तौल २.७ किलो घटेको अस्पतालले जनाएको छ ।
