सिन्धुली । असोज १५ गते सिन्धुलीगढी सम्पदा यात्रा हुने भएको छ । गोर्खाली सेनाले अंग्रेज फौजलाई हराएको २ सय ५६ बर्ष पुराभएको अवसरमा सम्पदा यात्रा गर्न लागिएको हो ।
राजा जयप्रकाश मल्ललाई सघाउन आएका इष्ट इन्डिया कम्पनीका अंग्रेज सेनालाई सिन्धुलीगढीमा आक्रमण गरी तत्कालीन गोर्खाली सेनाले वि.स. १८२४ साल असोज १५ गते खेद्न सफल भएका थिए ।
नेपाललाई सार्वभौम, स्वतन्त्र र अखण्ड बनाई राख्न निकै महत्वपूर्ण रहेको सिन्धुलीगढी विजय दिवसको सम्झनामा समृद्ध सिन्धुली अभियानले विगत १० वर्ष देखि विभिन्न कार्यक्रमका साथ गर्दै आएको छ ।
२ सय ५६औं सिन्धुलीगढी विजय उत्सवका अवसरमा समृद्ध सिन्धुली अभियानले स्टोरी साइकल, सिन्धुलीय श्रेष्ठ समाज, जनसमर डटकम र अन्य संस्थासँग मिलेर सिन्धुलीगढी सम्पदा यात्रा गर्न लागेको अभियन्ता सौरभ ढकालले बताए ।
सिन्धुलीगढी सम्पदा यात्राको मुख्य लक्ष्य ऐतिहासिक सिन्धुलीगढी युद्ध , त्यहाँका पुराना संरचना बारेमा खोज गर्ने र जानकारी दिने रहेको ढकालले बताए । सिन्धुलीगढी सम्पदा यात्रा यहि असोज १५ गते बिहान ७ बजे ढुंग्रेभञ्ज्याङबाट सुरु भएर पौवा गढी ,सिन्धुलीगढी, टुडिखेल , रानी दरबार हुँदै ५ किलोमिटरको दुरी तय गरेर सोलाभन्ज्याङमा आएर सकिने छ ।
सिन्धुलीगढीको बारेमा अध्यन तथा संरक्षणमा संलग्न दिलिप थापाले यात्राको नेतृत्व गर्ने जनाइएको छ । उमेरले ७८ वर्ष पार गरेका दिलिप कुमार थापाको सिन्धुली धार्मिक , पर्यटकीय तथा एतिहासिक झलक पुस्तक प्रकाशित छ ।
सम्पदा यात्रामा सहभागी हुन १००० रुपौया शुल्क तोकिएको जनाइएको छ । उक्त शुल्क यातायात, खाजा , खाना, होटल लगायतका सुविधा समावेश गरिएको जनाइएको छ ।
सहभागिताका लागि https://docs.google.com/forms/d/e/1FAIpQLSdSVEXnso0iCNDe5hloWGNVMZj7SuLpVxa9bsvNMBLouaFBPw/viewform मार्फत आफ्नो विवरण टिपाउन सकिने छ ।
