काठमाडाैं । त्रिभुवन विश्वविद्यालय (त्रिवि) का प्राध्यापकहरूले विद्युतीय हाजिरी मेसिन समेत राख्न नदिएको खुलासा भएको छ ।
त्रिभुवन विश्वविद्यालयका उपकुलपति प्रा.डा. धर्मकान्त बास्कोटाले पढाउँदै नपढाइ तलब बुझ्ने बेथिति निरुत्साहित गर्न आफूले व्यवस्था गरेको विद्युतीय हाजिरी मेसिन प्राध्यापकहरूले बोकेर हिँडेको बताएका छन् ।
‘हाम्रा त शिक्षकहरू पनि यस्ता भएकी २२ गते पुगेपछि एकाउन्टेनले पनि हाजिर गर्न आउनुस् भन्ने चलन । आएर हाजिर गर्यो, तलब बुझ्ने चलन,’ उपकुलपति बास्कोटाले भने, ‘यसलाई निरुत्साहित गर्न डिजिटल हाजिरी राखिदिएको शिक्षकहरूले बोकेर हिँडिदिए ।’
शुक्रबार प्रतिनिधिसभाअन्तर्गतको शिक्षा, स्वास्थ्य तथा सूचना समितिको बैठकमा बास्कोटाले विद्युतीय हाजिरी मेसिन बोकेर हिँड्नेहरूलाई कारबाही गर्न दिएको निवेदन प्रहरीले समेत बुझ्न नमानेको गुनासो गरे ।
उपकुलपति बास्कोटाले उनीहरूलाई कारबाहीका लागि काठमाडौंको कुनै एक होटलमा आफूहरूले गरेको मिटिङको माइन्युट समेत संगठनको आवरणमा केही मानिसहरूले लुटेर लगेको र तत्कालीन शिक्षामन्त्री देवेन्द्र पौडेलले बुझेकोमा असन्तुष्टि समेत व्यक्त गरे ।
‘मैले होटल एल्लो प्यागोडा, मेरो मित्रवत सम्बन्ध भएकाले पैसा नलिने, हामीलाई चिया पनि सित्तैमा खुवाउने त्यो ठाउँमा मिटिङ गरेको केही अराजक जत्था कुनै संगठनको आवरणमा आएर हामीहरूको माइनुट लुटेर लगेकै हो । लुटेर लगेको डकुमेन्ट किन बुझ्नुभयो ? अहिले पनि त्यो शिक्षामन्त्रीको मै छ,’ उपकुलपति बास्कोटाले भने, ‘अब हामीले पुलिसमा जाहेरी दिँदा नलिएको अवस्था छ । यी समस्याहरु छन् थुप्रै ।’
विश्वविद्यालय राजनीतिक भागवण्डाको थलो भएकाले यसको सुधारका लागि आफू एक्लैको प्रयासले सम्भव नहुने पनि बास्कोटाले पटकपटक दोहोर्याए ।
‘हामीहरूकोमा कर्मचारी संगठन, प्राध्यापक संघ र विद्यार्थीको युनियन- यो तीन वटा मात्रै हो । तर, विद्यार्थीको २२ वटा दर्ता भएका छन् । जति राजनीतिक दल, त्यति नै छन् । कति राजनीतिक दल छन्, मलाई त्यो पनि थाहा छैन । तर, ब्यानर लिएर आउँछन् । हाम्रो भाग चाहियो भनेर । यो हामीले बसालेको थिति हो,’ उपकुलपति बास्कोटाले भने, ‘हामीले गम्भिर भएर एनलाइसिस गरौँ । हामीले नै हटाउने हो । यो भीसी एक्लैले चाहेर हट्दैन माननीयज्यूहरू । मैले यो जानकारी गराएँ ।’
उपकुलपति बास्कोटाले त्रिविका कतिपय विषयका विद्यार्थीभन्दा शिक्षक बढी भएको स्वीकार गर्दै अब उनीहरूलाई आवश्यकताको आधारमा अध्यापन कार्यमा खटाउने गरी विद्युतीय प्रणालीको व्यवस्था गरिएको बताए ।
