- सिन्धुलीबाट रुद्र खड्काको सहयोगमा ।
सिन्धुली, जेठ ४ । मानव अधिकार सम्बन्धी पाँचौ राष्ट्रिय कार्ययोजना कार्यान्वयनको अवस्था बारे अन्तरक्रिया सम्पन्न भएको छ ।
जिल्ला समन्वय समिति सिन्धुलीको संयोजनमा भएको अन्तरक्रियामा ३० सदस्यीय जिल्ला स्तरीय ‘मानव अधिकार राष्ट्रिय कार्ययोजना, जिल्ला समन्वय समिति २०८०’ समेत गठन गरेको छ ।
कार्यक्रमको उद्घाटन गर्दै प्रमुख अतिथी राष्ट्रिय योजनाका आयोगका सदस्य तथा प्रवक्ता डा.रामकुमार फुयालले मानव अधिकार कार्ययोजनाका विषयवस्तुहरूलाई विकास योजनासंग समन्वय गरी अगाडी बढाउनुपर्नेमा जोड दिनुभयो ।
उहाँले नेपाल सरकारको पाँचौ राष्ट्रिय कार्ययोजनामा व्यवस्था भए बमोजिम जिल्ला स्तरीय मानव अधिकार राष्ट्रिय कार्ययोजना गठन भएको बताउदै योजना अनुरूप बैठक बसी कार्य सञ्चालन गर्न कार्यक्रमका सहभागीहरुलाई आग्रह गर्नुभयो । मानव अधिकार कार्ययोजना सफल रूपमा पुरा गर्न स्थानीयतहको पनि मुख्य भूमिका रहने बताउनुभयो ।
जिल्ला समन्वय समिति सिन्धुलीका प्रमुख कारसाङ लामाले मानव अधिकारको क्षेत्रमा आफुनो कार्यकालमा गर्नुपर्ने कर्तव्य र दायित्व पुरा गर्ने बताउँनु भयो ।
नेपाल सरकारले मानव अधिकार सम्बन्धी जारी गरेको पाँचौ राष्ट्रिय कार्ययोजना (२०७७÷०७८, २०८१÷०८२ को दफा ४.२.३ मा व्यवस्था भए बमोजिम जिल्ला स्तरीय मानव अधिकार राष्ट्रिय कार्ययोजना जिल्ला समन्वय समिति गठन गरिएको हो ।
उक्त समितको पहिलो बैठक बाट कार्ययोजना अनुगमन समितिको बैठक कम्तीमा ६÷६ महिना बस्ने र बैठकमा स्थानीय समन्वय समितिले मानव अधिकार सम्बन्धी गरेका काम कारबाहीको प्रगती विवरण पालीका प्रमुख वा अध्यक्षले प्रस्तुत गर्नुपर्ने र कार्ययोजना बमोजिम स्थानीय तहमा स्थानीय समन्वय समिति गठन नभएको स्थानीय तहहरूमा यथासिघ्र स्थानीय तह समन्वय समिति गठन गरी सोको जानकारी जिल्ला समन्वय समितिलाई दिने निर्णय गरेको छ ।
राष्ट्रिय मानव अधिकार आयोग बागमती प्रदेश कार्यालय हेटौडाको समन्वयमा सिन्धुलीको दुधौली नगरपालिका, मरिण, घ्याङ्लेख, तीनपाटन, फिक्कल गाउँपालिकामा स्थानीय तह अनुगमन संयन्त्र गठन भईसकेको जनाइएको छ ।
