काठमाडौँ। हालै भोटेकोशी नदीमा आएको भीषण बाढी र डुबानका कारण अटोमोबाइल क्षेत्रमा ठूलो जनधनको क्षति भएको प्रति नाडा अटोमोबाइल्स एसोसिएसन अफ नेपाल (नाडा) ले गम्भीर ध्यानाकर्षण भएको जनाएको छ। नाडाले यस दुःखद घडीमा आफ्ना सदस्य तथा प्रभावित व्यवसायीहरूको साथमा रहेको प्रतिबद्धता व्यक्त गरेको छ।
भोटेकोशी क्षेत्र तथा सीमावर्ती भन्सार नाकाहरूमा पैठारी भई आएका सवारीसाधनहरू क्षति भएको, धेरै सवारीसाधन हराएको वा सम्पर्कविहीन भएको तथा व्यवसायीका गोदाम, कार्यालय, भौतिक संरचना र उपकरणहरूमा क्षति पुगेको खबर प्राप्त भइरहेको नाडाले जनाएको छ।
यस कठिन परिस्थितिमा प्रभावित व्यवसायी तथा सदस्यहरूलाई आवश्यक सहजीकरण र समन्वय गर्न नाडाले सरकार, बीमा कम्पनी, बैंक तथा वित्तीय संस्था, भन्सार कार्यालयलगायत सरोकारवाला निकायहरूसँग पहल सुरु गरिसकेको छ।
राहत, समन्वय तथा बीमा दाबी प्रक्रियालाई व्यवस्थित र प्रभावकारी बनाउन नाडाले आफ्ना प्रभावित सदस्य कम्पनीहरूलाई क्षतिको यथार्थ तथा प्रमाणित विवरण नाडा सचिवालमा यथाशीघ्र उपलब्ध गराउन अनुरोध गरेको छ।
क्षतिको विवरणमा समावेश गर्नुपर्ने विषयहरू: १. बाढी तथा डुबानबाट क्षति भएका सवारीसाधनको विवरण
२. हराएका वा सम्पर्कविहीन भएका सवारीसाधनको विवरण
३. सवारीसाधन रहेको स्थान तथा सम्बन्धित भन्सार नाकाको विवरण
४. सवारीसाधनको संख्या, प्रकार तथा उपलब्ध पहिचान विवरण
५. गोदाम, कार्यालय तथा अन्य भौतिक संरचनामा भएको क्षतिको विवरण
६. बीमा गरिएको सम्पत्ति तथा सवारीसाधनको विवरण
७. बीमा दाबीका लागि आवश्यक कागजात तथा विवरण
८. बैंक तथा वित्तीय संस्थाबाट लिइएको ऋणसँग सम्बन्धित विवरण
९. अन्य प्रत्यक्ष व्यावसायिक क्षतिको विवरण
प्राप्त विवरणका आधारमा नाडाले बीमा दाबी प्रक्रियालाई छिटो र सहज बनाउन बीमा कम्पनीहरूसँग, तथा हराएका र क्षति पुगेका गाडीको पहिचानका लागि भन्सार कार्यालयसँग आवश्यक समन्वय गर्नेछ।
साथै, बैंक तथा वित्तीय संस्थाबाट लिइएको ऋणको पुनर्संरचना, भुक्तानी अवधि पुनरावलोकन तथा अन्य सहजीकरणका लागि सम्बन्धित निकायमा पहल गरिने नाडाले जनाएको छ। सरकारसमक्ष अटोमोबाइल क्षेत्रले व्यहोरेको क्षतिको समग्र विवरण प्रस्तुत गरी आवश्यक राहत र नीतिगत सम्बोधनका लागि नाडाले आवश्यकताअनुसार ‘समन्वय तथा सहजीकरण समिति’ गठन गरी अघि बढ्ने निर्णय गरेको छ।
नाडाका अध्यक्ष सुरेन्द्रकुमार उप्रेतीले संकटको यस घडीमा सबै प्रभावित सदस्यहरूलाई एकीकृत भई यथाशीघ्र क्षतिको यथार्थ विवरण नाडा सचिवालमा बुझाएर सहजीकरण कार्यमा सहयोग गर्न हार्दिक अपिल गर्नुभएको छ।
