भदौं ८ । सुदूरपश्चिम प्रदेशको प्रमुख आस्थाको केन्द्र तथा बाजुरा जिल्लामा समुद्र सतहबाट करिब ४,२०० मिटरको उचाइमा अवस्थित प्रसिद्ध धार्मिक एवं पर्यटकीय स्थल बडीमालिका क्षेत्रमा नेपाल टेलिकमले २जी तथा ४जी मोबाइल सेवा सञ्चालनमा ल्याएको छ । टेलिकमले बडीमालिका क्षेत्रमा ४जी सेवा विस्तार गरेसँगै आजदेखि मोबाइल तथा इन्टरनेट सेवा सञ्चालनमा आएको हो ।
अति विकट र भौगोलिक रूपमा चुनौतीपूर्ण क्षेत्रमा सेवा सञ्चालनका लागि प्राविधिक टोलीसहित नेपाली सेनाको हेलिकप्टरमार्फत उपकरण तथा जडान सामग्री ढुवानी गरी जडान कार्य तीव्र रूपमा अघि बढाइएको थियो । अत्यन्तै विकट तथा उच्च हिमाली भूगोलमा टावर स्थापना गर्न प्राविधिक टोलीले चुनौतीपूर्ण परिस्थितिमा काम गरेको थियो ।
निरन्तरको मिहिनेतपछि आज भदौ ०४ गतेदेखि उक्त क्षेत्रमा २जी तथा ४जी मोबाइल सेवा औपचारिक रूपमा सञ्चालनमा आएको छ ।
मोबाइल सेवा जडानसँगै त्रिवेणी नगरपालिकाको वडा नं. ५ र ६, बडीमालिका नगरपालिकाको वडा नं. ५ र ६ तथा बाजुरा सदरमुकाम मार्तडीबाट बडीमालिका जाने पदमार्गमा पर्ने प्रसिद्ध त्रिवेणी पाटन लगायतका क्षेत्रहरू दूरसञ्चार सेवाको पहुँचमा जोडिएका छन् । टावर निर्माण कार्यमा नेपाल टेलिकमका इन्जिनियर सुदर्शन आचार्य, प्राविधिक अधिकृत माधव बुढाथोकी, सिभिल इन्जिनियर दीपक भट्ट लगायतका प्राविधिकहरू रहेका थिए ।
उच्च हिमाली भेगमा सञ्चार पहुँच विस्तार भएसँगै स्थानीय बासिन्दाका साथै बडीमालिका दर्शन गर्न आउने भक्तजन, तीर्थयात्री तथा पदयात्रीहरूलाई सञ्चार सम्पर्कमा सहजता भई प्रत्यक्ष लाभ पुग्ने विश्वास टेलिकमले लिएको छ ।
