काठमाडौं — नेपाल खेलकुद पत्रकार मञ्च (एनएसजेएफ) ले आयोजना गर्ने नेपाली खेलकुद क्षेत्रको सर्वाधिक प्रतिष्ठित ‘२३औं संस्करणको एनएसजेएफ पल्सर स्पोर्टस अवार्ड २०८२’ को तयारी तीव्र पारिएको छ। आगामी भदौ १८ गते आयोजना हुने यस अवार्डअन्तर्गत बहुप्रतीक्षित ‘पिपुल्स च्वाइस’ विधाको मनोनयन सार्वजनिक गरिएको छ।
यससँगै मञ्चले अवार्डको आधिकारिक भोटिङ पार्टनरका रूपमा ‘Khalti By IME’ सँग औपचारिक सम्झौता पत्रमा हस्ताक्षर समेत गरेको छ।
वर्षभर उत्कृष्ट प्रदर्शन गरी चर्चामा रहेका तथा सम्भावना बोकेका खेलाडीहरूलाई जनमतका आधारमा पुरस्कृत गरिने यस विधामा विभिन्न खेलका ५ जना स्टार खेलाडीहरू मनोनयनमा परेका छन्:
- मीना सुनार (भलिबल): उदीयमान शक्तिशाली स्पाइकर मीना एभरेस्ट भलिबल क्लब बुटवलकी कप्तान हुन्। उनले काभा महिला च्याम्पियनसिप, काभा यु-१९ (उपविजेता), काभा यु-२० मा उत्कृष्ट प्रदर्शन गर्नुका साथै नेपाल पुलिस क्लबबाट काभा क्लब च्याम्पियनसिपमा तेस्रो स्थान दिलाउन महत्वपूर्ण भूमिका खेलेकी छन्।
- पूजा राना (फुटबल): एसियन कप छनोटमा उच्च प्रदर्शन गरेकी राष्ट्रिय महिला फुटबल टोलीकी सदस्य पूजाले वैदेशिक व्यावसायिक लिगमा समेत प्रभावशाली छाप छाडेकी छन्। उनी भुटानको ट्रान्सफर युनाइटेड तथा बंगलादेशका फरासगन्ज एफसी र नासरिन स्पोर्ट्स एकेडेमीसँग आबद्ध भई खेलिसकेकी छन्।
- सानुमाया थिङ (कराते): इजिप्टको कायरोमा आयोजित विश्व कराते च्याम्पियनसिपको छनोट चरण पार गरेकी सानुमायाले २१औं एसियन कराते च्याम्पियनसिपमा कांस्य पदकका लागि प्रतिस्पर्धा गरेकी थिइन्। उनी दक्षिण एसियाली करातेकी टिम काता स्वर्ण र एकल काता रजत विजेता हुनुका साथै यूकेकेसी च्यालेन्जकी स्वर्ण पदक विजेता हुन्।
- शेर मल्ल (क्रिकेट): आइसिसी टी-२० विश्वकपको डेब्यु खेलकै पहिलो बलमा विकेट लिएर इतिहास रचेका शेरले मलेसियामा आयोजित एसियन गेम्स क्वालिफायरमा उत्कृष्ट बलिङ गरेका थिए। उनी नेपाल प्रिमियर लिग (NPL) को दुवै सिजनका च्याम्पियन टोली (जनकपुर बोल्ट्स र लुम्बिनी लायन्स) का प्रमुख सदस्य हुन् (१० खेलमा १७ विकेट)। उनकै कप्तानीमा सुदूरपश्चिम प्रदेश प्रधानमन्त्री कपको फाइनल पुगेको थियो।
- रवीन्द्र ढाँट (मिक्स मार्सल आर्टस – MMA): ‘बझाङका बाघ’ उपनामले चिनिने एमएमए फाइटर रवीन्द्रले गत वर्ष म्याट्रिक्स फाइट नाइट १७ को बेन्टमवेट च्याम्पियन बनेर इतिहास रचेका थिए। उनी एसिया प्यासिफिक रिजनको २०५औं वरीयता प्राप्त फाइटर हुन्।
यस वर्षको स्पोर्टस अवार्डमा कूल ९ विधा (वर्ष खेलाडी पुरुष, वर्ष खेलाडी महिला, युवा वर्ष खेलाडी, वर्ष प्रशिक्षक, पिपल्स च्वाइस, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड र एसियाली खेलकुद पत्रकार अवार्ड) मा खेलाडी तथा खेलकर्मीहरूलाई सम्मानित गरिनेछ।
