काठमाडौं । गरिमा विकास बैंक लिमिटेडले नयाँ आर्थिक वर्ष २०८३/८४ को अवसरमा आफ्नो डिजिटल इकोसिस्टममा एकैसाथ तीनवटा नयाँ प्रविधिमा आधारित डिजिटल बैंकिङ सेवाहरू सार्वजनिक गरेको छ । बैंकले आफ्ना ग्राहकहरूलाई थप सहज, सुरक्षित र आधुनिक बैंकिङ सेवा प्रदान गर्ने उद्देश्यले यी सेवाहरू सञ्चालनमा ल्याएको हो ।
बैंकले औपचारिक रूपमा शुभारम्भ गरेका तीन नयाँ सेवाहरू यस प्रकार छन्:
- गरिमा प्रिपेड डलर कार्ड (Garima Prepaid Dollar Card):यस कार्डमार्फत ग्राहकहरूले नेपाल राष्ट्र बैंकले तोकेको सीमाभित्र रही अन्तर्राष्ट्रिय वेबसाइट, मोबाइल एप तथा ई–कमर्स प्लेटफर्महरूमा अमेरिकी डलरमा सुरक्षित अनलाइन भुक्तानी गर्न सक्नेछन् ।
- गरिमा पीओएस टर्मिनल (Garima POS Terminals):यस सेवामार्फत व्यवसायी तथा व्यापारीहरूले डेबिट, क्रेडिट तथा प्रिपेड कार्डहरू प्रयोग गरी सुरक्षित, छिटो र भरपर्दो डिजिटल भुक्तानी प्राप्त गर्न सक्नेछन् । यसले नगदरहित कारोबारलाई प्रवर्द्धन गर्दै व्यापारिक कारोबारलाई थप व्यवस्थित र प्रभावकारी बनाउने विश्वास बैंकले लिएको छ ।
- गरिमा इन्टरबैंक क्यूआर टेलर (Garima Interbank QR Teller):यस नवीन सेवामार्फत फोनपे (Fonepay) नेटवर्कमा आबद्ध जुनसुकै बैंक तथा वित्तीय संस्थाका ग्राहकहरूले आफ्नो मोबाइल बैंकिङ एपबाट गरिमाको इन्टरबैंक क्यूआर (QR) स्क्यान गरी गरिमा विकास बैंकको जुनसुकै शाखाबाट सहजै नगद प्राप्त गर्न सक्नेछन् ।
“डिजिटल रूपान्तरणलाई प्राथमिकतामा राख्दै बैंकले आफ्ना ग्राहकहरूलाई सुरक्षित, सरल, छरितो र गुणस्तरीय बैंकिङ सेवा उपलब्ध गराउने लक्ष्य लिएको छ । आगामी दिनहरूमा पनि नवीनतम प्रविधिमा आधारित सेवाहरू विस्तार गर्दै लैजाने प्रतिबद्धता बैंकले व्यक्त गरेको छ ।”
ISO 9001:2015 र ISO 27001:2022 मान्यता प्राप्त गरिमा विकास बैंकले देशभर आफ्ना १२६ शाखा कार्यालय, ५१ एटीएम एवं नवीनतम डिजिटल इकोसिस्टममार्फत करिब ९ लाख ग्राहकहरूलाई सरल, सुरक्षित एवं गुणस्तरीय वित्तीय सेवा प्रदान गर्दै आइरहेको छ ।
