काठमाडौं । नेपाल मेडिसिटी अस्पताल ले नेपालमा पहिलोपटक ‘चाइम’ (CHIME) बैठक आयोजना गर्दै देशलाई विश्वव्यापी डिजिटल स्वास्थ्य सञ्जालसँग जोड्ने महत्वपूर्ण पहल गरेको छ । मे ८ मा सम्पन्न उक्त कार्यक्रममा देशभरका १५ निजी तथा सरकारी अस्पतालका स्वास्थ्य सूचना प्रविधि क्षेत्रका विज्ञहरूको सहभागिता रहेको थियो ।
यस बैठकसँगै नेपाल औपचारिक रूपमा ‘चाइम भारत अध्याय’को उप–अध्यायका रूपमा आबद्ध भएको छ । अब नेपालका स्वास्थ्य सूचना प्रविधि क्षेत्रका नेतृत्वकर्ताहरू अन्तर्राष्ट्रिय डिजिटल स्वास्थ्य सञ्जालसँग प्रत्यक्ष रूपमा जोडिने भएका छन् ।
‘चाइम’ विश्वव्यापी गैर–नाफामूलक संस्था हो, जसले डिजिटल स्वास्थ्य नेतृत्व, स्वास्थ्य सूचना प्रविधिको विकास तथा आधुनिक स्वास्थ्य प्रणाली विस्तारमा काम गर्दै आएको छ । कार्यक्रममा नेपालका स्वास्थ्य क्षेत्रलाई प्रविधिमैत्री र अन्तर्राष्ट्रिय मापदण्डअनुसार रूपान्तरण गर्ने विषयमा विशेष छलफल गरिएको थियो ।
कार्यक्रममा बोल्दै नेपाल मेडिसिटीका प्रमुख डिजिटल तथा सूचना अधिकृत तथा चाइम भारत अध्यायका सदस्य सुधाकर राई ले चाइमसँगको सहकार्य नेपालको स्वास्थ्य क्षेत्रका लागि महत्वपूर्ण उपलब्धि भएको बताए ।
उनले भने, “चाइमसँगको सहकार्यले नेपाललाई अन्तर्राष्ट्रिय स्तरको स्वास्थ्य सूचना प्रणालीसँग जोड्ने अवसर दिएको छ । अब नेपाली स्वास्थ्य सूचना प्रविधि विज्ञहरूले विश्वस्तरीय ज्ञान, प्रविधि र अनुभवसँग प्रत्यक्ष पहुँच पाउनेछन् ।”
बैठकका क्रममा “चाइम नेपाल समुदाय” समेत गठन गरिएको छ । उक्त समुदाय स्वास्थ्य सूचना प्रविधि क्षेत्रका पेशाकर्मीहरूको व्यावसायिक सञ्जालका रूपमा क्रियाशील रहने बताइएको छ । समुदायमार्फत सदस्यहरूले डिजिटल स्वास्थ्य, साइबर सुरक्षा, दूरस्वास्थ्य सेवा, नेतृत्व विकास तथा अन्तर्राष्ट्रिय प्रमाणपत्र कार्यक्रमसम्बन्धी जानकारी र अवसर प्राप्त गर्नेछन् ।
कार्यक्रममा भारतका विभिन्न अस्पतालका स्वास्थ्य सूचना प्रविधि विज्ञहरू भर्चुअल माध्यमबाट सहभागी भएका थिए । चाइम भारत अध्यायले नेपालको डिजिटल स्वास्थ्य रूपान्तरणमा सहकार्य गर्ने प्रतिबद्धता समेत जनाएको छ ।
अधिकृत राईका अनुसार नेपालमा चाइमको उपस्थितिले स्वास्थ्य क्षेत्रमा नयाँ अवसर सिर्जना गर्नुका साथै डिजिटल स्वास्थ्य रूपान्तरणलाई तीव्र बनाउनेछ । यसले स्वास्थ्य सूचना प्रविधि क्षेत्रमा कार्यरत जनशक्तिलाई अन्तर्राष्ट्रिय अनुभव, सिकाइ र नवीन प्रविधिसँग जोड्ने अपेक्षा गरिएको छ ।
यसअघि पनि नेपाल मेडिसिटीले स्वास्थ्य प्रविधि क्षेत्रमा उल्लेखनीय उपलब्धि हासिल गर्दै आएको छ । हालै भारतको हैदराबादमा आयोजित एक अन्तर्राष्ट्रिय सम्मेलनमा अस्पतालले ‘एक्सिलेन्स इन रिमोट हेल्थ केयर’ पुरस्कार प्राप्त गरेको थियो । उक्त पुरस्कार दूरस्वास्थ्य सेवा, टाढाबाट गरिने चिकित्सकीय परामर्श, सघन उपचार कक्षको दूरसेवा तथा स्मार्ट अस्पताल प्रणालीमा पुर्याएको योगदानका लागि प्रदान गरिएको अस्पतालले जनाएको छ ।
