काठमाडौँ / नाडा अटोमोबाइल्स एसोसिएसन अफ नेपाल -नाडा_को एक प्रतिनिधि मण्डलले आज वाणिज्य, आपूर्ति तथा उपभोक्ता संरक्षण विभागका महानिर्देशक रोशन ज्ञवालीसँग अटोमोवाइल वस्तुमा अधिकतम खुद्रा मूल्यसहितको स्टिकर अनिवार्य गर्ने विषयमा विस्तृत छलफल गरेको छ।
विभागले चैत ३० गते जारी गरेको प्रेस विज्ञप्तिपछि उत्पन्न भएका विषयमा नाडाले ध्यानाकर्षण जनाउँदै अनिवार्य रूपमा अधिकतम मूल्य उल्लेख गर्ने र बिक्री गर्दा विल विजक जारी गर्ने व्यवस्थालाई स्वागत गरेको जनाएको छ।
साथै, कार्यान्वयनका क्रममा देखिने समस्या र जिज्ञासाबारे स्पष्टता माग्दै नाडाले लिखित सुझाव समेत पेश गरेको छ।
छलफलका क्रममा नाडाले पुरानो स्टकमा रहेका सामग्रीको व्यवस्थापन, भन्सार विन्दुमै स्टिकर टाँस्ने प्रावधानको व्यवहारिकता लगायतका विषय उठाएको थियो।
नाडाले आफूहरू सधैF निष्पक्ष व्यापार र पारदर्शिता प्रवर्द्धनमा प्रतिबद्ध रहेको पनि उल्लेख गरेको छ।
महानिर्देशक ज्ञवालीले उपभोक्ता संरक्षण ऐन २०३५ अनुसारकै व्यवस्थालाई कार्यान्वयनमा ल्याइएको र सरकारको १०० बुँदे कार्यक्रम अन्तर्गत यसलाई प्राथमिकतामा राखिएको बताए।
उनले कार्यान्वयनका क्रममा देखिने समस्या समाधान गर्न विभाग तयार रहेको उल्लेख गर्दै व्यवसायीहरूबाट पनि प्रतिबद्धता आवश्यक पर्ने धारणा राखे।
उनले अधिकतम मूल्यसहितको स्टिकर टाँस्ने विषयमा उद्योगी तथा आयातकर्ताप्रति विभाग कडा रूपमा प्रस्तुत हुने स्पष्ट पार्दै आवश्यक परे कानुनी सुधारका लागि नाडाबाट सुझाव आउनुपर्ने बताए।
छलफलमा नाडाका उपाध्यक्ष विक्रम सिंघानिया, महासचिव मिलनबाबु मल्ल, सचिव मेघराज पौडेल, कोषाध्यक्ष पंकज अग्रवाल, सहकोषाध्यक्ष निलमणी पाठक, केन्द्रीय सदस्य दिपेन्द्रकुमार मिश्र र नारायणप्रसाद पौडेल लगायतको उपस्थिति रहेको थियो।
