काठमाडौं, ३० फागुन। गैरआवासीय नेपाली संघ (एनआरएनए) को १२औँ विश्व सम्मेलन तथा अन्तर्राष्ट्रिय अधिवेशन काठमाडौंस्थित सोल्टी होटलमा सुरु भएको छ। कार्यक्रमको उद्घाटन परराष्ट्रमन्त्री बालानन्द शर्मा र पूर्वप्रधानमन्त्री झलनाथ खनालले पानसमा दीप प्रज्वलित गरेर गरेका हुन्।
उद्घाटन समारोहमा बोल्दै परराष्ट्रमन्त्री शर्माले गैरआवासीय नेपालीहरूको अनुभव, सीप र अन्तर्राष्ट्रिय नेटवर्क नेपालको विकास तथा रूपान्तरणका लागि महत्त्वपूर्ण रहेको बताए। उनले प्रवासी नेपालीहरूको योगदानले औद्योगिक विकास र रोजगारी सिर्जनामा सहयोग पुग्ने उल्लेख गरे। संविधान र कानुनले गैरआवासीय नेपालीलाई राष्ट्रको साझेदारका रूपमा स्वीकार गरेको भन्दै उनले लगानी र सांस्कृतिक जिम्मेवारी अझ बढाउन आग्रह गरे।
मन्त्री शर्माले विदेशमा रहेका नेपालीहरूको सुरक्षा सरकारको प्राथमिकतामा रहेको पनि बताए। मध्यपूर्व क्षेत्रमा देखिएको संकटलाई ध्यानमा राख्दै नेपाली कामदारहरूको सुरक्षाका लागि सरकारले इमरजेन्सी कन्ट्रोल रुम सञ्चालनमा ल्याएको र आवश्यक सहयोग तथा समन्वयको व्यवस्था गरिएको जानकारी दिए।
कार्यक्रममा स्वागत मन्तव्य राख्दै एनआरएनएका कार्यकारी अध्यक्ष महेशकुमार श्रेष्ठले संघभित्रको विवाद अन्त्य भई एकता स्थापित भएको बताए। उनले विश्वभर रहेका नेपालीहरू मातृभूमिको विकासमा योगदान गर्न उत्सुक रहेको उल्लेख गर्दै आगामी कार्यसमितिले संघको दिशा निर्धारण गर्ने बताए। साथै निर्वाचन र डेलिगेट प्रणालीमा सुधार गरेर सबैलाई मतदान अधिकार सुनिश्चित गर्ने प्रतिबद्धता जनाए।
संस्थापक अध्यक्ष उपेन्द्र महतोले व्यक्तिगत सफलताभन्दा देशको समृद्धि महत्वपूर्ण भएको उल्लेख गर्दै “नेपालका लागि नेपाली” नाराका साथ सुरु भएको अभियानलाई अझ सशक्त बनाउन आग्रह गरे। उनले गैरआवासीय नेपालीको लगानी नआएसम्म अन्य विदेशी लगानी पनि आकर्षित हुन कठिन हुने बताए।
कार्यक्रममा कार्यकारी अध्यक्ष डा. बद्री केसी, पूर्वअध्यक्षहरू विनोद कुँवर, जीवा लामिछाने, भवन भट्ट, आरके शर्मा, पहिलो महिला अध्यक्ष रबिना थापा लगायतले पनि सम्बोधन गरेका थिए। उनीहरूले गैरआवासीय नेपाली नागरिकता, लगानी, श्रमिक अधिकार तथा कानुनी सुधारका विषयलाई प्राथमिकतामा राख्न सरकारसँग आग्रह गरे।
सम्मेलनले संघको भावी कार्यदिशा तय गर्नुका साथै प्रवासी नेपालीहरूको ज्ञान, सीप, पुँजी र अनुभवलाई नेपालको विकासमा उपयोग गर्ने विषयमा छलफल गर्ने अपेक्षा गरिएको छ।
