जेबी अन्तरविद्यालय बास्केटबल शुक्रबारदेखि

जेबी स्कुलको आयोजनामा दोश्रो जेबी अन्तरविद्यालय बास्केटबल प्रतियोगिता शुक्रबारदेखि हुने भएको छ ।
प्रतियोगितामा सिनियर गल्र्स र जुनियर ब्वाइजमा समान १२–१२ गरी २४ टिमको सहभागिता रहने जेबी स्कुलका प्रिन्सिपल नारायण रोकाले बुधबार आयोजित पत्रकार सम्मेलनमा जानकारी गराए । दुवै विधामा सहभागी टिमलाई ४ समूहमा विभाजन गरी लिग कम नकआउट आधारमा खेल खेलाइने छ । हरेक समूहको विजेता र उपविजेता क्वाटरफाइनलमा पुग्ने छन् । सिनियर गल्र्समा कक्षा ९ सम्म तथा जुनियर ब्वाइजमा कक्षा ७ सम्म अध्ययनरतले प्रतियोगितामा सहभागी हुन पाउने छन् ।
सिनियर गल्र्सको समूह ‘ए’ मा तेजस्वी एकेडेमी, जेबी र इडेन ब्रिज एकेडेमी (इबीए), समूह ‘बी’ मा आरम्भ, ग्रिनल्यान्ड र मन्जरी, समूह ‘सी’ मा त्रिवेणी, भ्याली पब्लिक र बेलमोन्ट तथा समूह ‘डि’ मा बसुन्धरा नेसनल एकेडेमी (बीएनए), फेरिल्यान्ड र सत्य साइ रहेका छन् ।
जुनियर ब्वाइजको समूह ‘ए’ मा आरम्भ, ओएसिस् एकेडेमी र पारामाउन्ट एकेडेमी तथा समूह ‘बी’ मा जेबी, स्कोलर्स होम र पारामाउन्ट एकेडेमी रहेका छन् । त्यस्तै बीएमसीए, लालीगुराँस नेसनल एकेडेमी र ओडिसी इन्टरनेनसल एकेडेमी समूह ‘सी’ तथा त्रिवेणी, बीएनए र ग्रिनल्यान्ड समूह ‘डि’ छन् ।
प्रतियोगिता सञ्चालन गर्न करिब १ लाख ५० हजार रुपैयाँ खर्च हुने आयोजक जेबीकी निर्देशक सुजु थापाले बताइन् । माघ २८ गतेसम्म चल्ने प्रतियोगिताका खेलहरु बूढानीलकण्ठ नगरपालिको च्यासिन्डोलस्थित आयोजकै कोर्टमा खेलाइने छ । पत्रकार सम्मेलनमा जेबीका भाइस प्रिन्सिपल गणेश न्यौपाने र बास्केटबल प्रशिक्षक नारायण सापकोटाले प्रतियोगिताको विविध पक्ष बारे प्रकाश पारेका थिए ।