राष्ट्रिय स्तरीय हाप्किडो कौशल विकास सेमिनार डडेलधुरामा

डडेलधुरा, पुष ८ । सुदूरपश्चिम प्रदेश हाप्किडो संघको आयोजना तथा नेपाल हाप्किडो संघको स्वीकृतिमा राष्ट्रिय स्तरीय हाप्किडो कौशल विकास सेमिनार– २०८२ पुस १७ देखि १९ गतेसम्म अलिताल गाउँपालिका, डडेलधुरामा हुने भएको छ ।
सेमिनारको उद्देश्य हाप्किडो प्रशिक्षक तथा अभ्यासकर्ताहरूलाई उन्नत प्रशिक्षण, सीप विकास र अनुभव आदान प्रदानको अवसर प्रदान गर्नु रहेको छ । कार्यक्रममा सहभागीहरूले अनुभवी राष्ट्रिय तथा अन्तर्राष्ट्रिय प्रशिक्षकहरूसँग अन्तरक्रिया गर्दै आफ्नो प्रविधि सुधार्ने अवसर पाउने छन् ।
सेमिनारमा हाप्किडोका विभिन्न विधा, आत्मरक्षा प्रविधि, शारीरिक तथा मानसिक तयारीका साथै रेफ्री, प्रशिक्षक र नेतृत्व विकाससम्बन्धी प्रशिक्षण प्रदान गरिने आयोजकले जनाएको छ । व्यावहारिक अभ्यास, समूह सत्र र व्यक्तिगत निर्देशनमार्फत सहभागीहरूको सीप अभिवृद्धि गराइनेछ ।
सुदूरपश्चिम प्रदेश हाप्किडो संघका प्रमुख प्रशिक्षक राजेन्द्र मडैले सेमिनारले राष्ट्रिय स्तरीय हाप्किडो खेलको स्तर उकास्नुका साथै नयाँ प्रतिभाको खोजी र विकासमा महत्वपूर्ण योगदान पु¥याउने विश्वास व्यक्त गरे । उनले सेमिनारको अन्तिम दिन सहभागीहरूलाई प्रमाणपत्र वितरण गरिनुका साथै उत्कृष्ट प्रतिभालाई विशेष सम्मान प्रदान गर्ने बताए ।