काठमाडौं । सरकारले फेसबुक, एक्स (ट्विटर), र युट्युबलगायतका सामाजिक सञ्जालहरू बन्द गरेको विरोधमा नेपाल पत्रकार महासंघका पूर्व पदाधिकारी र सदस्यहरूले आज (आइतबार) माइतीघर मण्डलामा विरोध प्रदर्शन गर्ने भएका छन्।
दर्ता नभएको कारण देखाएर सामाजिक सञ्जालहरूमाथि लगाइएको प्रतिबन्धले प्रेस तथा अभिव्यक्ति स्वतन्त्रतामाथि गम्भीर आघात पुगेको उनीहरूको भनाइ छ। सरकारको यो कदमले संविधानले सुनिश्चित गरेको नागरिकको सूचना र सञ्चारको हक कुण्ठित गरेको विज्ञप्तिमा उल्लेख गरिएको छ।
सरकारको यस कदमले विदेशमा रहेका नेपाली र उनीहरूको परिवारबीचको सम्पर्क टुटेको, बालबालिकाको सिकाइमा असर परेको र हजारौँ व्यक्तिको रोजगारी गुमेको पनि विज्ञप्तिमा जनाइएको छ।
उनीहरूले सरकारसँग सामाजिक सञ्जाल तत्काल खुला गर्न र दीर्घकालीन समाधानका लागि अध्ययन कार्यदल गठन गर्न माग गरेका छन्। विरोध प्रदर्शन आज दिउँसो २ बजे माइतीघर मण्डलामा हुनेछ।
