काठमाडौं । सडकमा चल्ने हरेक सवारीसाधनले अब ‘इम्बोस्ड नम्बर प्लेट’ जडान नगरे जरिवाना तिर्नुपर्ने भन्ने प्रश्नले पछिल्लो समय सामाजिक सञ्जालदेखि गाडी पार्किङसम्म धेरैलाई अन्योलमा पारेको छ ।
तर, यातायात व्यवस्था विभागले मंगलबार एक औपचारिक सूचना जारी गर्दै यस्तो आशंका र हल्लालाई पूर्ण रूपमा खारेज गरेको छ ।
विभागका महानिर्देशक राजिव पोखरेलद्वारा हस्ताक्षरित प्रेस विज्ञप्तिमा भनिएको छ,‘इम्बोस्ड नम्बर प्लेट जडान नगरे तुरुन्त जरिवाना वा कारबाही हुन्छ भन्ने हल्ला पूर्णत: निराधार छ। यसमा भ्रममा नपर्न सर्वसाधारणमा हार्दिक आग्रह छ ।’
दक्षिण एशियाली राष्ट्रहरूलाई डिजिटल प्रणालीतर्फ अग्रसर गराउने सरकारी योजनाअनुरूप नेपालमा पनि यातायात क्षेत्रलाई क्रमश: डिजिटल बनाउने अभियान चलिरहेको छ । विज्ञप्तिमा भनिएको छ,‘त्यसैअनुरूप सवारी साधनमा इम्बोस्ड नम्बर प्लेट अनिवार्य गर्दै लैजाने योजना छ, तर विभागले स्पष्ट पारेको छ कि हाललाई यो अनिवार्य छैन र स्वेच्छिक रूपमा जडान गर्न सकिनेछ।’
विभागले सेवाग्राहीलाई आफू अनुकूलको समयमा, सवारी दर्ता गराएको कार्यालयमा गएर स्वत:स्फुर्त रूपमा नम्बर प्लेट जडान गर्न सकिने जनाएको छ । जसका लागि पूर्वाधार तथा जनशक्ति व्यवस्थापनमा काम भइरहेको पनि उल्लेख छ । हालसम्म अनलाइन र सामाजिक सञ्जालमार्फत फैलिएको ‘असोज १ देखि इम्बोस्ड प्लेट नभए जरिवाना लाग्छ’ भन्ने खबरलाई विभागले स्पष्ट रूपमा अस्वीकार गरेको हो ।
इम्बोस्ड नम्बर प्लेटमा प्रयोग गरिएको अंग्रेजी लिपिबारे उठेका प्रश्नहरूबारे पनि विभागले जवाफ दिएको छ । विज्ञप्तिमा भनिएको छ,‘सवारी चालक अनुमतिपत्र, राहदानी, नागरिकता र राष्ट्रिय परिचयपत्रजस्ता अन्य महत्वपूर्ण कागजातहरूमा पनि अंग्रेजी लिपि प्रयोग हुने गरेकाले इम्बोस्ड प्लेटमा अंग्रेजी प्रयोग उचित हो ।’
यस्तै, विभागले ठेक्का सम्झौताअनुसार सर्वोच्च अदालतको संवैधानिक इजलासबाट पनि यस विषयमा त्रुटि नरहेको पुष्टि भइसकेको उल्लेख गरेको छ ।
