काठमाडौँ / गभर्नर डा. विश्वनाथ पौडेलले सम्पत्ति विवतरण सार्वजनिक गरेका छन् । गभर्नर नियुक्त भएपछि सम्पत्ति विवरण सार्वजनिक गर्नुपर्ने व्यवस्था बमोजिम उनले आफ्नो सम्पत्ति विवरण नेपाल राष्ट्र बैंकलाई बुझाएका हुन् ।
जसअनुसार उनीसँग दुई ठाउँमा गरी २ करोड १५ लाख रुपैयाँ बराबरको घरजग्गा रहेको छ । दुवै स्थानको जग्गा श्रीमती प्रतिभाको नाममा छ। ललितपुरमा ५ आना २ दामको जग्गामा २७९५ वर्गफिटको घरजग्गा उनले पैतृक सम्पत्ति र स्वआर्जनबाट १ करोड ५५ लाख रुपैयाँमा किनेको उल्लेख छ ।
नवलपरासीको गैँडाकोटमा पनि पैतृक सम्पत्ति र स्वआर्जनबाट उनले ६० लाख रुपैयाँमा घरजग्गा किनेको विवरणमा उल्लेख छ।
गभर्नर पौडेलसँग पैतृक सम्पत्तिको रूपमा करिब ४५ तोला सुनका गहना छन् । त्यस्तै, उनले स्वआर्जनबाट करिब १५ लाख रुपैयाँमा किनेको हिराको गहना छ ।
सानिमा, नेपाल इन्भेष्टमेन्ट मेगा र प्रभु बैंकमा गरी पौडेल र उनको श्रीमतीको नाममा गरी २० लाख ६८ हजार रुपैयाँ बचत रहेको देखिन्छ ।
यसबाहेक उनको डलर खातामा ६६.७८ डलर र उनको श्रीमतीको नाममा ४४ सय ४६ अमेरिकी बचत रहेको छ ।
उनको सानिमा बैंक, सानिमा माई हाइड्रो, सानिमा मिडल तमोर हाइड्रो, ग्लोबेको प्रालि, संयुक्त ऊर्जा हाइड्रोपावर र चितवन इनर्जी लिमिटेडमा सेयर रहेको छ।
पौडेलको श्रीमतीको नाममा २०७७ सालमा ४४ लाख रुपैयाँमा खरिद गरेको सुजुकी कार छ। पौडेलको आफ्नो र पत्नीको नाममा गरेर २३ करोड रुपैयाँभन्दा बढी सम्पत्ति देखाएका छन् भने ऋण लेनदेन भने नभएको उल्लेख गरेका छन् ।
