काठमाडौं । तिब्बत क्षेत्रमा ‘अत्यधिक वर्षा हुने सम्भावना रहेको जानकारीसंगै सिमा जोडिएका जिल्लाले स्थानीयलाइ सतर्क अपनाउन सूचना जारी गरेका छन ।
उक्त सूचनाको आधारमा सिन्धुली, सिन्धुपाल्चोक र काभ्रे प्रशासनले सुनकोशी तटीय क्षेत्रमा सतर्कता अपनाउन स्थानीयलाई आग्रह गरेका छन् ।
सिन्धुली जिल्ला प्रशासन कार्यालयले असार ४ गते एक सूचना मार्फत चीनको प्रहरीले जानकारी दिए अनुसार आगामी असार ७ गतेसम्म तिब्बत क्षेत्रमा अत्याधिक वर्षाको सम्भावना रहेको भन्दै सुनकोशी नदि किनार आसपास वसोवास तथा आवतजावत गर्दा सतर्कता अपनाउन आग्रह गरको छ ।
यस्तै
सिन्धुपाल्चोकले भोटेकोशी र सुनकोशी नदी आसपासका ६ वटा पालिकाका बासिन्दालाई सतर्कता अपनाउन भनेको छ ।
‘भोटेकोशी गाउँपालिका, बाह्रबिसे नगरपालिका, त्रिपुरासुन्दरी गाउँपालिका, सुनकोशी गाउँपालिका, बलेफी गाउँपालिका र चौतारा साँगाचोकगढी नगरपालिकाको भोटेकोशी
सुनकोशी नदी आसपास क्षेत्रमा जोखिम हुन सक्ने भएकाले नदी आसपास क्षेत्रमा बसोबास गर्नुहुने महानुभावहरूमा सतर्कता अपनाउन अनुरोध छ’ सहायक प्रमुख जिल्ला अधिकारी गणेश नेपालीले आज जारी गरेको सूचनामा लेखिएको छ ।
यस्तै काभ्रेले सूचना जारी गरी भुम्लु, तेमाल र रोशी गाउँपालिकाका तटीय क्षेत्रका बस्ती जोखिममा पर्न सक्ने भन्दै सतर्कता अपनाउन भनिएको छ ।
