काठमाडौं । एनसेलले अपट्रेन्डलीसँगको सहकार्यमा ‘लिग अफ क्रियटर्स’ अभियानको सुरूआत गरेको छ । यसले नेपालभरि फैलिएर रहेका भावी प्रतिभाशाली डिजिटल सामग्री निर्माताहरूको पहिचान र सशक्तीकरण गर्ने लक्ष्य लिएको छ ।
‘क्रियट, कम्पिट, कन्कर’ भन्ने उत्साहजनक नारासहित सुरू भएको यस अभियानको प्रतियोगिताले डिजिटल कन्टेन्ट क्रियटर्स बन्न चाहनेहरूलाई ‘माइ नेटवर्क, माइ कनेक्टिभिटी’ भन्ने विषयवस्तुमा आधारित रही आफ्ना सामग्री प्रस्तुत गर्न प्लेटफर्म प्रदान गर्दछ । प्रतियोगितामार्फत सहभागीहरूले आफ्नो पहिचान बनाउने मौका पाउनेछन् र साथै पुरस्कारका रुपमा एनसेलसँग १० लाख रुपैयाँ बराबरको एक वर्षको ब्राण्ड डिल जित्ने मौका पाउनेछन् ।
सहभागी प्रतियोगिहरूलाई सञ्जोग कोइराला, प्रतिमा अधिकारी, मिस्टर फूडी नेपाल, पराक्रम राणा, एकता तण्डुकारजस्ता सम्बन्धित क्षेत्रका अग्रणी व्यक्तित्वहरू र चर्चित क्रियटर्सहरूले मार्गदर्शन गर्नेछन् ।
‘यो केवल प्रतियोगिता मात्र होइन, यो एक सिर्जनात्मक विकास यात्रा हो, जसमा मेन्टरशिप, कार्यशालाहरू, वास्तविक अनुभव लिँदै सिक्ने मौका, चुनौतीपूर्ण चरणहरू र रोमाञ्चक पुरस्कारहरू रहेका छन्,’ एनसेलकी मार्केटिङ कम्युनिकेशन तथा सस्टेनेबिलिटी निर्देशक पुनम सिंहले भनिन्, ‘यस अभियानमार्फत हामी नयाँ पुस्ताका हाम्रा नेपाली डिजिटल सामग्री निर्माताहरूलाई सिक्ने, अघि बढ्ने र प्रभावशाली सामग्रीमार्फत परिवर्तन ल्याउन प्रेरणा दिदै सशक्त बनाउने प्लेटफर्म दिन चाहन्छौँ । नेपालको डिजिटल इकोसिस्टमको हिस्सा भएका नाताले हामी प्रतिभाको विकास र रूपान्तरणमा सक्रिय भूमिका खेल्न प्रतिबद्ध छौँ ।’
प्रतियोगिताका लागि जेठ १८ गते शुक्रबारदेखि दर्ता खुला भइसकेको छ । यो प्रतियोगितामा पहिला अनुभव भएका वा नभएका सबै १६ वर्षमाथिका नेपाली डिजिटल सामग्री निर्माता अर्थात् क्रियटर्सले सहभागिता जनाउन सक्छन् ।
सहभागीहरूले आफ्नो नेटवर्क र कनेक्टिभिटीप्रतिको व्यक्तिगत वा भावनात्मक बुझाइ झल्किने ३० देखि ९० सेकेन्डको भर्टिकल भिडिओ तयार गरी टिकटक र इन्स्टाग्राम दुवैमा पोष्ट गर्नुपर्दछ । यसरी पोष्ट गर्दा क्याप्सनमा एनसेललाई २ल्अभिि ट्याग गर्दै तोकिएको आफ्नो मेन्टरजस्तै #TeamSanjog र #NcellLeagueOfCreators2025 लेखिएको हुनुपर्दछ । भिडिओ पोष्ट गर्ने अन्तिम म्याद जेठ २७, २०८२ रहेको छ ।
देशभरिबाट प्राप्त हुने भिडिओहरूबाट उत्कृष्ट ५० जना क्रियटर्सलाई मेन्टरहरूले छान्नेछन्, जसले विशेष प्रशिक्षण र मेन्टरशिप प्राप्त गर्नेछन् । यसरी छानिने ५० जना क्रियटर्स ५ जना मेन्टरको नेतृत्वमा रहने समूहहरूमा विभाजन गरिनेछन् र प्रत्येक समूह एनसेल आइकनमा आयोजना हुने कार्यशालामा सहभागी हुनेछन् । यो अभियानमा च्यालेञ्ज राउण्ड पनि समावेश छ, जसमा सहभागीहरूले आफूलाई प्रदान गरिएको सिर्जनात्मक ब्रिफिङबमोजिम सामग्री तयार पार्नुपर्ने हुन्छ र विज्ञ निर्णायकहरूले त्यसको मूल्याङ्कन गर्नेछन् ।
‘लिग अफ क्रियटर्स’ को ग्राण्ड फिनाले असार १४, २०८२ मा आयोजना गरिनेछ र विजेताको घोषणा गरिनेछ । उत्कृष्ट प्रतिभाहरूलाई मनोरञ्जनात्मक कार्यक्रममाझ सम्मान गरिनेछ । मुख्य विजेताले एनसेलसँग १० लाख रुपैयाँ बराबरको एक वर्षका लागि ब्राण्ड डिल प्राप्त गर्नेछ । यस्तै, नेपालका शीर्ष क्रियटर्सहरूसँग विशेष प्रशिक्षण, देशव्यापी पहिचान र नेटवर्किङका अवसरहरू यस प्रतियोगिताका थप आकर्षणहरू हुन् ।
साथै, एनसेल र अमेरिकी दूतावासका सम्बन्धित प्रतिनिधिहरूले सहभागी क्रियटर्सहरूको सामग्रीको मूल्याङ्कन गर्नेछन् ।
यस प्रतियोगितामा सहभागी हुन कुनै शुल्क लाग्दैन । सहभागीहरू अभियान अवधिभर नेपालमै हुनु आवश्यक छ । यस प्रतियोगितामा सहभागी हुन र अन्य थप जानकारीका लागि www.ncell.com.np/en/individual/league-of-creators भिजिट गर्न सकिनेछ ।
