काठमाडौं । काठमाडौंको नागढुंगामा ट्राफिक इन्स्पेक्टरले प्रहरी जवानलाई कुटेको विषयमा चालकसंग पैसा लेनदेन गरेको पाइएको छ ।
जिम्मेवारीबाट दुवैलाई निलम्वन गरी थालिएको प्रारम्भीक अनुसन्धानका क्रममा प्रहरी जवानले सवारी चालकसंग पैसा मागेको भेटिएको जनाइएको छ ।
बुधबार सामाजिक सञ्जालमार्फत सार्वजनिक भएको भिडिओमा ट्राफिक प्रहरी इन्स्पेक्टर जितेन्द्रकुमार साहले प्रहरी जवान मदन खड्कालाई कुटेको पाइएको अनुसन्धानका क्रममा खुलेको छ ।
ड्युटीमा रहेको बेला बर्दीमै मध्यसडकमा हातपातमा उत्रिएपछि दुवै जनाको जिम्मेवारी खोस्दै अनुसन्धान अघि बढाइएको छ । काठमाडौं उपत्यका प्रहरी कार्यालय रानिपोखरीका प्रवक्ता तथा एसएसपी शेखर खनालले एक विज्ञप्ति जारी गर्दै छानबिनका लागि दुवैलाई जिम्मेवारीबाट हटाइएको बताए ।
यो विवाद के हो भन्नेबारे प्रहरीले आन्तरिक छानबिन अघि बढाएको छ । प्रहरी स्रोतका अनुसार अहिलेसम्मको छानबिनले कुटाइ खाएका प्रहरी जवानले काठमाडौं छिर्न लागेका गाडीहरुबाट अवैध रुपमा रकम उठाएको खुलेको छ ।
