एसकेबिसी वाग्मती प्रदेश आमन्त्रित तेक्वान्दो हुने

राष्ट्रिय खेलकुद परिषद्ले अघि सारेको “राष्ट्रका लागि खेलकुद, स्वास्थ्यका लागि खेलकुद“ भन्ने नारालाई व्यवहारमा उतार्ने उद्देश्यसहित २०७८ सालमा स्थापना भएको श्री समाज खेलकुद विकास क्लब (एसकेबिसी) निरन्तर रूपमा तेक्वान्दो खेल र समग्र खेलकुद क्षेत्रको विकासमा सक्रिय रहँदै आएको छ ।
स्थापना कालदेखि नै क्लबले विभिन्न स्तरका खेलकुद प्रतियोगिताहरू सफलतापूर्वक सम्पन्न गर्दै आएको छ । विगतमा क्लबले पहिलोपटक एसकेबिसी वाग्मती प्रदेश आमन्त्रित तेक्वान्दो प्रतियोगिता, एकपटक वाग्मती लिग प्रतियोगिता, पाँचपटक इन्टर डोजाङ प्रतियोगिता, एकपटक उपत्यका स्तरीय तथा जिल्ला स्तरीय प्रतियोगिता, साथै दुईपटक राष्ट्रपति रनिङ शिल्ड प्रतियोगिता आयोजना गरिसकेको गौरवपूर्ण इतिहास रहेको छ ।
यसै क्रममा, क्लबले आगामी २०८२ जेठ ३ र ४ गतेका दिन हेराल्ड इन्टरनेशनल कलेज, बसुन्धारा काठमाडौंमा “दोस्रो एसकेबिसी वाग्मती प्रदेश आमन्त्रित तेक्वान्दो प्रतियोगिता – २०८२” आयोजना गर्न लागेको छ । प्रतियोगिताको मुख्य प्रायोजकको रूपमा टोखा नगरपालिका रहनेछ भने वाग्मती प्रदेश तेक्वान्दो संघ सह–आयोजक तथा प्राविधिक सहयोगीको रूपमा रहनेछ ।
यस प्रतियोगितामा वाग्मती प्रदेशका १३ जिल्लाबाट ३६ स्वर्ण पदकका लागि ५ सयभन्दा बढी महिला तथा पुरुष खेलाडीहरूको प्रतिस्पर्धा हुने एसकेबीसीका प्रमुख प्रशिक्षक रन्जित डंगौराले जनाएका छन् । खेलाडीहरूबीच स्वस्थ प्रतिस्पर्धा, अनुशासन, आत्मविश्वासको विकास र खेलकुदमार्फत सामाजिक एकता र भाइचाराको प्रवद्र्धन प्रतियोगिताको मुख्य उद्देश्य हो ।
प्रतियोगितामा उत्कृष्ट प्रदर्शन गर्ने खेलाडीहरूलाई मेडल, ट्रफी, प्रमाणपत्र तथा खेलकुद सामग्रीहरू प्रदान  गरिनेछ । साथै, प्रतियोगितामा विशेष योगदान तथा उत्कृष्ट प्रदर्शन गर्ने महिला तथा पुरुष खेलाडी, प्रशिक्षक र निर्णायकमध्ये ४ जनालाई ओप्पो मोबाइल प्रदान गरी सम्मानित गरिनेछ ।
प्रतियोगिताको अनुमानित खर्च १५ लाख रुपैयाँ रहेको छ, जसको व्यवस्थापनका लागि विभिन्न संघसंस्था, निकाय तथा खेलप्रेमी व्यक्तित्वहरूको साथ र सहयोगको अपेक्षा गरिएको छ ।
यस महत्वपूर्ण तेक्वान्दो प्रतियोगितामा सम्पूर्ण खेलप्रेमी, अभिभावक, सञ्चारकर्मी, समाजसेवी तथा सरोकारवालाहरूलाई उपस्थित भई कार्यक्रमलाई सफल बनाउन हार्दिक आमन्त्रण गर्दछौं । तपाईंहरूको अमूल्य साथ, सहयोग र उपस्थितिले आगामी दिनमा यस्ता कार्यक्रमहरूलाई थप व्यापक बनाउने दिशामा हामीलाई ऊर्जा र प्रेरणा मिल्नेछ ।