काठमाडौं । हेटौँडा उपमहानगरपालिकाले एक सैलुनमा एसी र जेनेरेटर जडानका लागि तोक तोक आदेश गरेको भेटिएको छ ।
प्राप्त विवरण अनुसार हेटौँडा–४ मा सुरु गरिएको द नाइन्टिन सैलुनको उद्घाटनका क्रममा हेटौँडा उपमहानगरपालिकाकी मेयर मिना लामाले गर्मी रहेको भन्दै एसी जडानको लागि वाचा गरेको जनाइएको छ ।
सोही बाचालाई सम्झँदै सैलुन सञ्चालक सुसन घलानले गर्मीको महिना सुरु भएको र आफ्नो सैलुनमा ग्राहकको भिड बढेको भन्दै उपमहानगरलाई एक थान एसी र एक थान इन्भर्टरको लागि निवेदन दिएका थिए ।
उपमहानगरले पनि निवेदकको माग बमोजिम सामानको लागत अनुमान तयार गरी दिनु भन्ने तोक लगाएपछि उक्त पत्र सामाजिक सञ्जालमा एकाएक भाइरल भएको छ ।
सामाजिक सञ्जाल प्रयोगकर्ताले एउटा निजी व्यवसायलाई एसी दिने गरी तोक लगाउनु सुशासनको खिलाफ भन्ने आशयले तर्क गरिरहेका छन् ।
यो विषयमा उपमहानगरले भने अहिलेसम्म आफ्नो आधिकारिक धारणा सार्वजनिक गरेको छैन ।
उपमहानगर स्रोतले भने एसी विलासिताको सामानमा परेको कारण अहिले लागत स्टिमेट मात्र माग भएपनि दिने वा नदिने भन्ने निर्णय भइनसकेको बताएको छ ।
