काठमाडौं । विश्व बजारमा चर्चित मोबाइल ब्रान्ड मोटोरोला नेपाली बजारमा आधिकारिक रूपमा प्रवेश गरेको छ । चाैधरी ग्रुप अन्तर्गतको सीजी मोबाइलले यो ब्रान्ड नेपाल भित्र्याएको हो । सिजी मोबाइलले मोटोरोलासँगको लामो समयको छलफलपछि रणनीतिको साझेदारी गरेको हो ।
तत्कालको लागि नेपालमा ३ वटा मोडलका स्मार्टफोन लञ्च गरिएको छ । मोटोरोलाको जी-४५, जी-६४ र जी-८५ मोडल नेपाल भित्र्याइएको सीजी मोबाइलका व्यापार एकाइ प्रमुख विनय जोशीले बताए । पहिलो चरणमा ३ प्रडक्ट भित्र्याए पनि व्यवसायलाई थप विस्तार गर्दै लैजाने उनले बताए । ‘हामी यतिमै सीमित हुँदैनौं । तुरून्तै मोटोरोलाको अरू फोनहरू इन्ट्री लेभलका फोन जी-०५, फ्लिप फोन (मोटोरेजर), मोटो एड्ज ५० फ्युजनसहित अन्य उत्पादनहरू छिट्टै ल्याउनेछौं । सँगै भारतमा लञ्च हुने फोनहरूलाई पनि हामी यहाँ लञ्च गर्छौं’ उनले भने । चरणबद्ध रूपमा नेपालमा मोटोरोलाको बजार विस्तार गर्ने सिजी मोबाइलले जनाएको छ ।
मोटोरोला आफ्नै इतिहास बोकेको ब्राण्ड हो । यसले भारतसहित विश्व बजारमा आफ्नो पहिचान बनाउन सफल भएको छ । कतिपय उत्पादनमा मोटोरोलाले आफ्नो रणनीति नै परिवर्तन गरेको छ । मोटोरोलाले विश्वव्यापी बजारका लागि आफ्नो रणनीति परिवर्तन गरेको छ । यो नेपाली बजारमा पनि यसलाई रुचाउने विश्वास वितरकको छ ।
सिजी मोबाइलले यसअघि पनि नथिङ र सेमी ब्राण्डसँग सहकार्य गर्दै आइरहेको थियो । मोटोरोलालाई ६ महिनाभित्र शिर्ष तीनमा ल्याउने प्रयासमा सिजी मोबाइल छ ।
सिजी एउटा ब्राण्डलाई स्थिर बनाएपछि अरू ब्राण्ड पनि भित्र्याउने गरेको छ । सोही अनुसार नै बजार विस्तार गर्ने योजना रहेको जोशीले बताए । ‘मोबाइल व्यवसायमा आक्रामक ढंगले सिजी मोबाइल अगाडी बढ्छ । एक वर्षअघि नथिङ फोनको काम सुरू गर्यौं । त्यसको ६ महिनापछि अर्को ब्राण्ड सीएमफको काम सुरू गर्यौं । त्यसको ६ महिनापछि फेरि मोटोरोला ब्राण्ड सुरू गरेका छौं । अब हामीले चाहेको हुन्छौं त्यो सँग सहकार्य गर्न प्रयासरत रहनेछौं’ उनले भने । सिजी मोबाइल नम्बर वान हुने ढंगमा काम गर्ने उनको दाबी छ ।
विभिन्न चरणमा विभाजन गरेर नेपालमा सस्तोदेखी महँगोसम्म सबै भित्र्याउने तयारी वितरकको छ । प्रत्येक ग्राहकलाई बजेट मैत्री हुनेगरी मोटोरोला ब्राण्ड भित्र्याउने वितरकले जनाएको छ । सीजी मोबाइलले साढे २४ हजार रुपैयाँदेखि माथिका स्मार्टफोन नेपाली बजारमा भित्र्याएको छ ।
मोटो जी-४५ को विशेषतामा ८ जीबी र्याम र १२८ जीबी स्टोरेज हुनेछ । जसको मूल्य २४ हजार ४९९ रुपैयाँ रहेको छ ।
८ जीबी र्याम र १२८ जीबी स्टोरेजको मोटो जी-६४ को मूल्य २७ हजार ४९९ र १२ जीबी र्याम, २५६ जीबी स्टोरेज भएको जी-६४ मोडेलको मोबाइलको ३० हजार ९९९ रुपैयाँ तोकिएको छ । ८ जीबी र्याम र १२८ जीबी स्टोरेजको मोटो जी-८५ को मूल्य भने ३४ हजार ४९९ रहेको छ । १२ जीबी र्याम र २५६ जीबी स्टोरेजको जी-८५ मोडेलको ३७ हजार ४९९ तोकिएको छ ।
मोटो एड्ज फिप्टी फ्यूजनको मूल्य ४६ हजार ४९९ रहेको छ । यसमा १२ जीबी र्याम र २५६ जीबी स्टोरेज रहेको छ ।
नेपाली उपभोक्तालाई नवीनतम प्रविधि उचित मूल्यमा उपलब्ध गराउने प्रतिबद्धतासहित यी फोन विस्तार गरिएको कम्पनीको भनाइ छ ।
मोटो रेजर ५० फोल्ड गर्न मिल्ने डिजाइन प्रिमियम स्मार्टफोन प्रयोगकर्तालाई लक्षित गरिएको छ भने मोटो जी४५ र मोटो जी६४ ले बजेट सेगमेन्टमै उत्कृष्ट प्रदर्शन गर्ने फोन हुन् । सीजी डिजिटल आउटलेटहरुबाट यी स्मार्टफोन खरिद गर्दा शून्य प्रतिशत ईएमआई सुविधा उपलब्ध हुने कम्पनीले जनाएको छ ।
