काठमाडौं । रोयल इनफिल्ड बुलेट मोटरसाइकल चढेर ल्यापटप चोर्न हिँड्ने एक ‘खुँखार’ चोरलाई प्रहरीले १४ औं पटक गिरफ्तारी गरेकोछ ।
विभिन्न हुलिया परिवर्तन गर्दै चोरीको श्रृंखला चलाएका २५ वर्षीय हिमाल रसाइलीलाई जिल्ला प्रहरी परिसर ललितपुरले गिरफ्तार गरी हिरासतमा छन् ।
‘आश्रय, हम्मे’जस्ता उपनामले परिचित सुनसरीको धरान उपमहानगरपालिका–१५ घर भएका रसाइली चोरीको अनुसन्धान गर्ने प्रहरीहरूका लागि नौलो नाम होइन ।
१३ पटकसम्म काठमाडौंको विभिन्न स्थानहरूमा चोरी गरेर मुद्दा चलेपछि उनले आफ्नो कार्यक्षेत्र समेत परिवर्तन गर्दै ललितपुर पुगेका थिए । पछिल्लो समय ललितपुरका विभिन्न स्थानमा उनले चोरीको श्रृंखला चलाएका थिए । त्यो पनि विशेषगरी, ल्यापटप मात्रै ।
केही समयअघि मात्रै जिल्ला प्रहरी परिसर जावालखोल, ललितपुरमा ल्यापटप चोरीको दुईवटा उजुरी आयो । एउटा उजुरी पुल्चोकस्थित कार्यलयबाट ल्यापटप चोरी भएको थियो भने अर्को झम्सीखेलबाट । दुई फरक ठाउँ भए पनि चोरीको प्रकृति एउटै किसिमको थियो । जाहेरी आएपछि प्रहरीले अनुसन्धान गर्दा चोरी कार्यमा बुलेट बाइकको प्रयोग भएको खुल्यो ।
सीसीटीभी फुटेजमार्फत् अनुसन्धान अघि बढाएको प्रहरीले दुई चोरीमा एउटै नम्बर प्लेटको बुलेट मोटरसाइकल प्रयोग भएको पत्ता लगायो । फुटेजमा देखिएको बा ५७ प ९७६० नम्बरको मोटरसाइकललाई केन्द्रमा राखेर प्रहरीले अनुसन्धान गरेको थियो । सोही क्रममा मोटरसाइकल धनीबारे पत्ता लगायो, रमेश रुचाल ।
रुचाल भारतीय नागरिकलाई लुटपाट गरेको आरोपमा केन्द्रीय कारागार सुन्धारामा रहेको खुलेपछि उक्त मोटरसाइकल चलाउने व्यक्तिको खोजी गर्दा चोर पत्ता लगाउन प्रहरी सफल भएको थियो । रुचालको उक्त मोटरसाइकल हाल पक्राउ परेका रसाइली चढ्ने गरेको खुलेपछि टेकुबाट प्रहरीले उनलाई पक्राउ गरेको थियो ।
परिसर ललितपुरका एसएसपी शेखर खनालका अनुसार ६ मंसिरमा रसाइलीलाई पक्राउ गरिएको हो । पार्किङमा राखिएको मोटरसाइकल लिन आउने क्रममा उनी पक्राउ परेका थिए । उनीमाथि थप अनुसन्धान गर्ने क्रममा प्रहरीले चोरीको ल्यापटप किनेर बेच्ने गिरोहका अर्का मुख्य व्यक्ति डडेल्धुराको बागेश्वर गाउँपालिका–१ घर भएका २९ वर्षीय भोजबहादुर थलाल पक्राउ परे ।
२५ वर्षको उमेरमा ८ वटा चोरी र ५ वटा अभद्र व्यवहारको कसुरमा पक्राउ परेर कारबाही भोगेका व्यक्ति हुन्, रसाइली । १५ वर्षको उमेरदेखि नै चोरीमा पक्राउ पर्न थालेका रसाइलीको चोरी यात्रा एक दशक पुगिसकेको छ । एक दशकमा १४ पटकसम्म पक्राउ परेर कारबाही भोग्दा पनि उनको चोरी भन्दा भने रोकिएको छैन ।
उनी पक्राउ परेपछि क्रिमिनल रेकर्ड सिस्टम (सीआरएस) जाँच गर्दा यसअघि १३ पटक पक्राउ परेर कारबाही भोगेका व्यक्ति रहेको खुलेको प्रहरीले जनाएको छ ।
