काठमाडौं । उपप्रधानमन्त्रीसमेत रहेका अर्थमन्त्री विष्णु पौडेलसहित चार मन्त्रीमाथि छानबिनको माग गरेर अख्तियार दुरुपयोग अनुसन्धान आयोगमा उजुरी परेको छ । बिहीबार युवराज सफलले अर्थमन्त्री पौडेलसहित परराष्ट्रमन्त्री आरजु राणा, ऊर्जामन्त्री दीपक खड्का र श्रममन्त्री शरदसिंह भण्डारीविरुद्ध आयोगमा उजुरी दिएका हुन् ।
उजुरीमा अर्थमन्त्री पौडेल ललिता निवास प्रकरणमा मुछिएको र रूपन्देहीको देवीनगरमा नक्कली सुकुम्बासी बनेर सार्वजनिक जग्गा लिएकाले छानबिन हुनुपर्ने माग गरिएको छ ।
यसैगरी, परराष्ट्रमन्त्री राणामाथि नक्कली भुटानी शरणार्थी प्रकरण र टीकापुरमा सरकारी जग्गा हिनामिना, ऊर्जामन्त्री खड्कामाथि नेपाल स्काउटको सरकारी जग्गा हिनामिनामा संलग्न भएको दाबीसहित छानबिनको माग गरिएको छ ।
श्रममन्त्री भण्डारीले विभिन्न समयमा श्रम मन्त्रालयमा रहेर विवादित काम गरेको दाबी उजुरीमा गरिएको छ । मन्त्री भण्डारी विभिन्न बहानामा लाखौँ कमिसन खाइरहेको सफलको आरोप छ ।
सफलले आरोपबाट सफाइ नपाएसम्म चारैजना मन्त्री पदमा बस्न नमिल्ने जिकिर गरेका छन् । उनले आफूले दिएको उजुरीमा कारबाही नगरे सर्वोच्च अदालत जाने पनि बताएका छन् ।
