९ असोज, काठमाडौं । नेपाल विद्युत प्राधिकरणलाई प्रिमियम मूल्यमा धितोपत्रको प्राथमिक सार्वजनिक निष्कासन (आईपीओ) जारी गर्न दिने प्रस्ताव मन्त्रिपरिषद्मा पेश भएको छ ।
प्राधिकरणलाई आईपीओ निस्कासन गर्न दिने प्रस्ताव स्वीकृतिका लागि ऊर्जा मन्त्रालयले मन्त्रिपरिषद्मा पठाएको ऊर्जा मन्त्रालयले जनाएकाे छ ।
अर्थ मन्त्रालयले आईपीओ निस्कासनका लागि सहमति दिएसँगै यस सम्बन्धी प्रस्ताव ऊर्जाले अघि बढाएको हो ।
प्राधिकरणको जारी पूँजी ३ खर्ब पुर्याएर त्यसको १० प्रतिशत सेयर सर्वसाधारणमा जारी गर्ने तयारी गरिएको छ । प्राधिकरणले संस्थाको वित्तीय पुनर्संरचना गरी नेपाल विद्युत् प्राधिकरण ऐन, २०४१ बमोजिम संस्थाको सेयर सर्वसाधारणमा बिक्री गर्ने भएको हो ।
प्राधिकरण सञ्चालक समितिको गत २५ मंसिरमा बसेको बैठकले आईपीओ जारी गर्ने निर्णय गरेको थियो ।
प्राधिकरणले प्रतिसेयर १०० रुपैयाँ अंकित मूल्यमा प्रतिसेयर १३० रुपैयाँ प्रिमियमसहित प्रतिकित्ता २३० रुपैयाँमा आईपीओ जारी गर्ने निर्णय भएको विद्युत् प्राधिकरणले जनाएकाे छ ।
प्राधिकरणले जारी पूँजी ३ खर्ब रुपैयाँको १० प्रतिशत सेयर सर्वसाधारणलाई जारी गर्ने निर्णय गरेको छ । त्यस हिसाले ३० अर्ब पूँजी संकलनका लागि ३० करोड कित्ता सेयर निस्कासन हुनेछ ।
धितोपत्र दर्ता तथा निष्कासन नियमावली, २०७३ मा खुद सम्पत्ति (नेटवर्थ) को दुई गुणासम्म प्रतिसेयर मूल्य कायम गरी प्रिमियम मूल्यमा आईपीओ जारी गर्न सक्ने व्यवस्था छ । हाललाई प्रस्तावित अधिकृत पूँजीको १० प्रतिशतसम्म सर्वसाधारणलाई सेयर जारी गर्न ऊर्जा मन्त्रालयमार्फत मन्त्रिपरिषद्मा स्वीकृतिका लागि अनुरोध गरिएको हो ।
प्राधिकरण सञ्चालक समितिले अर्थ मन्त्रालयबाट अधिकृत पूँजी तीन खर्ब कायम गर्न सहमति पाएपछि ऊर्जा मन्त्रालयमार्फत मन्त्रिपरिषद्समक्ष स्वीकृतिका लागि अनुरोध गर्ने निर्णय गरेको थियो ।
