गणेशमान सिंह राष्ट्रिय टेनिस सुरु

कार्तिक १८, वीर गणेशमान सिंह फउन्डेसन तथा वीर गणेशमान सिंह स्पोर्ट्स कमिटीको संयुक्त आयोजनामा तेश्रो वीर गणेशमान सिंह राष्ट्रिय टेनिस प्रतियोगिता शनिबारदेखि सातदोबाटोस्थित टेनिस कम्प्लेक्समा सुरु भएको छ ।
प्रतियोगिताको फाउन्डेसनका अध्यक्ष समेत रहेका पूर्व उपप्रधानमन्त्री प्रकाशमान सिंहले एक कार्यक्रमबीच उद्घाटन गरे । उद्घाटनका अवसरमा निर्णायकको तर्फबाट टेनिसकी मुख्य प्रशिक्षक रेणुदेवी कोन्डा तथा खेलाडीको तर्फबाट शिभाली गुरुङले शपथ ग्रहण गरेका थिए ।
प्रतियोगितामा सिनियर, भेट्रान र जुनियरमा गरी जम्मा २३ स्पर्धा समावेश छन् । सिनियरमा ४, भेट्रानमा ७ र जुनियरमा १२ स्पर्धामा खेल हुनेछ ।
प्रतियोगिताको कुल पुरस्कार राशी ९ लाख ५ हजार रुपैयाँ रहेको छ । जुनियरमा भने प्रोत्साहन स्वरुप गिफ्ट ह्याम्पर प्रदान गरिने छ ।
नेपाल टेनिस संघको प्राविधिक सहयोगमा भइरहेको प्रतियोगिताको पहिलो दिन पुरुष सिंगल्समा आर्यन गिरी, बोरिस अधिकारी, साम्दुप लामा, प्रसिद्ध मोक्तान, युगेन शेर्पा, विपुलविभोर अधिकारी र दर्शिल श्रेष्ठले जित हात पारे ।
भेट्रान ३५ वर्षमाथि पुरुष सिंगल्समा अनिशमान श्रेष्ठ र वृजेश लाकौलले सफलता पाए । ४५ वर्षमाथि पुरुष सिंगल्समा मनोजविक्रम शाह, हरिबहादुर बस्नेत, विमल गुरुङ, मानबहादुर कटुवाल, हेमराज ढकाल र जोली टार्गेन विजयी भए । ५५ वर्षमाथि पुरुष सिंगल्समा सुशिलराज पाण्डे तथा सुनिल गुरुङ अघिल्लो चरणमा प्रवेश गरेका छन् ।
यु–८ ब्वाइज सिंगल्समा भिरल अग्रवाल, आयान पन्त, रिधन श्रेष्ठ, कायन चालिसे, साहंस बस्नेत, शुभम श्रेष्ठ, जिवश भट्टराई र टोनिस श्रेष्ठले आ–आफ्नो प्रतिद्वन्द्वीलाई पराजित गरे । सो स्पर्धाको गल्र्समा निम्ति कुँवर, रजिशा जोशी, पर्नभी राणा, इरिस श्रेष्ठ, येशी पाख्रिन तामाङ, निशु गुप्ता, मान्भी क्षेत्री र तभिसी राणाले जित आत्मासात् गरे ।
यु–९ ब्वाइज सिंगल्समा कायन चालिसे, तोनिस श्रेष्ठ, भिरल अग्रवाल र निश्चल ज्ञवाली अगाडि बढे । यु–१० गल्र्स सिंगल्समा स्वारह थापा र जिवश्री भट्टराईले पहिलो चरण पार गरे ।
यु–१२ ब्वाइज सिंगल्समा सन्दिप जिसी, संज्ञा रोका, सुजन कुइकेल, सानावाज हुसेन, अर्याशराज पौडेल र दर्शित अग्रवाल विजयी भए । उक्त स्पर्धाको गल्र्समा जेनिशा ज्ञवालीले बाजी मारिन् । यु–१४ ब्वाइज सिंगल्समा साश्वत वज्राचार्य र सन्दिप विक सफल भए ।