काठमाडाैं । इजरायलमा हमास समूहको आक्रमणमा परी ज्यान गुमाएका नेपालीहरूको परिवारलाई सरकारले १० लाख रुपैयाँ राहत उपलब्ध गराउने भएको छ।
सोमबार बसेको मन्त्रिपरिषद् बैठकले गृह मन्त्रालयमार्फत राहत रकम निकासा गर्ने निर्णय गरेको हो। ‘यस घटनामा निधन भएका नेपालीहरूको परिवारलाई राहतस्वरूप प्रतिपरिवार १० लाख रुपैयाँ उपलब्ध गराउनेछ। उक्त रकम अर्थ मन्त्रालयले गृह मन्त्रालयमार्फत निकासा दिने,’ सरकारको निर्णयमा भनिएको छ।
यसैगरी, इजरायल सरकारसँगको समन्वय र सहयोगमा त्यहाँस्थित नेपाली दूतावासले यस घटनामा बेपत्ता भएका नेपालीको खोजीमा तीव्रता दिने तथा घाइतेहरूको तत्काल उपचारका लागि समन्वय र सहजीकरण गर्ने निर्णय पनि सरकारले गरेको छ।
