काठमाडौं । सिजनका फलफुल हुन या तरकारी सबैको महत्व वेग्लै छ ।
स्वास्थ्यक दृष्टिकोणले पनि मानव शरिरका लागि अत्यन्तै फाइदाजनक मानिन्छ ।
बसन्त ऋतु शुरुभएसंगै निहुरो सागको सिजन शुरु हुन्छ । खानाका पारखीहरुका लागि बसन्त ऋतुको उपहार हो निहुरोको साग ।
बैशाख जेठमा गाँउगरतिर तरकारीको गर्जो निहुरोले पनि टार्छ ।
निहुरो वनजंगलमा आफै पलाउँने उन्यु प्रजातिको घाँस हो । पहाड र तराई सबैतिरको जंगलमा निहुरो पाइन्छ । तर, यसको जातमा केही भिन्नता हुन्छ । साथै स्वाद पनि फरक हुन्छ । तुलनात्मक रुपमा पहाडको जंगलमा पाइने निगुरो बढी स्वादिलो हुन्छ ।
पहाडमा कालो निहुरो बढी पाइन्छ भने तराइका क्षेत्रमा हरियो हुन्छ । वनजंगलमा आफै उम्रने भएकाले यसमा कुनै रासयनिक मल वा विषादी प्रयोग हुँदैन ।
नेपालीको सायदै यस्तो भान्सा होला, जहाँ निहुरो पाकेको छैन । वर्षायाम लागेसँगै कतिले वनजंगलबाट खोजेर र कतिले बजारबाट किनेर निगुरो पकाउने गर्छन् । निहुरोलाई भुटेर वा आलुसँग मिसाएर पनि खान सकिन्छ ।
निहुरो खानुका धेरै फाइदाहरु छन् । वनजंगलमा उम्रिएका हुनाले यो जैविक र मौसमी तरकारी पनि हो । पोषणविद्हरुले निहुरो पौष्टिकताले भरिपूर्ण रहेको बताउने गर्छन् । निहुरोको सेवन स्वास्थ्यका लागि फाइदाजनक बताइन्छ ।
निहुरोमा प्रोटिन, क्याल्सियम, भिटामिन ए लगायतका पोषकतत्व पाइन्छ । बालबालिका र गर्भवती महिलालाई त निगुरो झनै बढी लाभदायक छ । किनभने निहुरोको तरकारी सेवन गरिहरहँदा भिटामिन प्राकृतिक रुपमै प्राप्त हुन्छ ।
अतिरिक्त भिटामिनको चक्की चपाइरहनु पर्दैन । पोषणविदहरुले यसमा कोलेस्ट्रोल एवं बोसोजन्य पदार्थ नपाईने भएकाले कुनैपनि किसिमको हानी नहुने बताएका छन् ।
