काठमाडौं ।जेष्ठ ५, नक्कली भुटानी शरणार्थी प्रकरणमा भुटानी शरणार्थीका नेता टेकनाथ रिजाल पनि पक्राउ परेका छन् । उनी पक्राउ परेसँगै नक्कली शरणार्थी प्रकरणमा पक्राउपर्नेको संख्या १६ पुगेको छ ।
सो प्रकरणमा मुछिएका नेपाल हज समितिका अध्यक्ष शमशेर मियालाई पनि प्रहरीले बिहीबार पक्राउ गरेको थियो । रिजाललाई भने प्रहरीले झापाबाट पक्राउ गरी काठमाडौं ल्याएको हो । मियाँ सिंहदरबारभित्रैबाट पक्राउ परेका हुन् । उनी प्रहरीको खोजीमा थिए ।
जिल्ला प्रहरी परिसर काठमाडौंका प्रमुख एसएसपी दानबहादुर कार्कीले रिजाललाई अनुसन्धानका लागि पक्राउ गरिएको जानकारी दिए ।
‘रिजाललाई अनुसन्धानका लागि पक्राउ गर्नुपर्ने देखिएकाले पक्राउ गरेका हौं, उनको संलग्नता’दयगत थप अनुसन्धानपछि खुल्छ,’ काठमाडौं परिसरका एसएसपी कार्कीले राजधानीसँग भने ।
प्रहरीका अनुसार रिजालले भुटानी शरणार्थी समस्याको समाधान गर्न कार्यदल बनाइनुपर्ने माग गर्दै आएका थिए । उनकै मागअनुसार सरकारले ३० जेठ २०७६ मा वालकृष्ण पन्थीको संयोजकत्वमा कार्यदल बनाएको थियो ।
यसैगरी, रिजालको नक्कली शरणार्थी खडा गर्ने काममा समेत कनेक्सन देखिएको प्रहरीले अनुसन्धानका क्रममा फेला पारेको छ ।
प्रहरी स्रोतका अनुसार रिजालले सो प्रकरणमा पक्राउ परेका सानु भण्डारीको डायरीबाट नक्कली शरणार्थी खडा गर्ने सिलसिलामा ७ लाख बुझेको रेकर्ड प्रहरीले फेला पारेको हो । प्रहरीले सोही लिखित रेकर्डका आधारमा रिजाललाई पक्राउ गरिएको जनाएको छ ।
यसैगरी, प्रहरीले गृह मन्त्रालयअन्तर्गतको हजसमितिका अध्यक्ष मियाँलाई आफू चढ्ने सरकारी नम्बर प्लेटको गाडी नक्कली शरणार्थी प्रकरणमा मुछिएका गिरोहलाई चढ्न दिएको आरोप लागेको छ । उनले चढ्ने सेतो प्लेटको बीएबी १४०५ नम्बरको सरकारी गाडी गिरोहले प्रयोग गर्ने गरेको प्रहरीले अनुसन्धानका क्रममा फेला पारेको थियो ।
यसअघि प्रहरीले पूर्वउपप्रधानमन्त्री तथा नेकपा एमालेका निलम्बित सचिव टोपबहादुर रायमाझी र पूर्वगृहमन्त्री तथा कांग्रेस नेता वालकृष्ण खाँण, कांग्रेस नेता आङ्टावा शेर्पासहित १४ जनालाई पक्राउ गरी अनुसन्धान गर्दै आइरहेको छ ।
नेपाली नागरिकलाई नक्कली भुटानी शरणार्थी बनाउने समूहमा भूमिका रहेको आरोपमा नेपाल सरकारका सचिव तथा पूर्वगृहसचिव टेकनारायण पाण्डे, तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राईसमेत अनुसन्धानका लागि प्रहरी हिरासतमा छन् ।
यसैगरी, केशव दुलाल, टंक गुरुङ, सानु भण्डारी, सागर राई, पूर्वगृहमन्त्री खाँणका स्वकीय सचिव नरेन्द्र केसी, सन्देश शर्मा, टोपबहादुरका छोरा सन्दीप रायमाझी, रामशरण केसी र गोविन्द चौधरी पनि प्रहरी अनुसन्धानकै क्रममा हिरासतमा छन् ।
प्रहरीले नक्कली भुटानी शरणार्थी बनाएर अमेरिका पठाउने प्रकरणमा मुछिएका १४ जनालाई बुधबार नै थप तीन दिन हिरातसमा राख्न जिल्ला अदालत काठमाडौंले अनुमति दिएको थियो ।
