काठमाडौँ। ग्रामीण क्षेत्रदेखि शहरी क्षेत्रसम्म सरल, सुरक्षित एवं गुणस्तरीय बैंकिङ्ग सेवा प्रवाह गर्दै आइरहेको गरिमा विकास बैंक लिमिटेडले आफ्नो शाखा सञ्जाल विस्तार गर्ने क्रममा काठमाडौँ महानगरपालिका वडा नं. ३, बालुवाटारमा १२७औँ शाखा कार्यालय सञ्चालनमा ल्याएको छ।
वि.सं. २०६४ कात्तिक १८ गते विकास बैंकले पहिलो पटक कारोबार सञ्चालन गरेको १९औँ वर्षको विशेष अवसर पारेर २०८३ कात्तिक १८ गते बुधबारदेखि बालुवाटारस्थित आफ्नो केन्द्रीय कार्यालय रहेको भवनमा बालुवाटार शाखा कार्यालय सञ्चालनमा ल्याएको हो।
विकास बैंकका अध्यक्ष श्री दिलिप प्रताप खाँणज्यूको अध्यक्षतामा सम्पन्न समुद्घाटन कार्यक्रमका प्रमुख अतिथि नेपाल राष्ट्र बैंक, वित्तीय संस्था सुपरिवेक्षण विभागका कार्यकारी निर्देशक श्री विश्रुत थापाज्यूले बालुवाटार शाखाको समुद्घाटन गर्नुभएको हो।
सञ्चालनमा आएको बालुवाटार शाखामार्फत ग्राहकहरूले नियमित बैंकिङ्ग सेवाका अतिरिक्त एटिएम (ATM), लकर, विदेशी मुद्रा सटही लगायतका सुविधाहरू प्राप्त गर्न सक्नेछन्। आम नागरिकको बैंकिङ्ग सेवामा पहुँच अभिवृद्धि गर्ने, वित्तीय समावेशीकरणलाई थप सुदृढ बनाउने तथा ग्राहकहरूलाई सहज र विश्वसनीय बैंकिङ्ग सेवा उपलब्ध गराउने उद्देश्यका साथ विकास बैंकले आफ्नो शाखा सञ्जाल विस्तारलाई निरन्तरता दिँदै आएको छ।
विकास बैंकले शाखा विस्तारलाई केवल भौगोलिक उपस्थितिको वृद्धिमा मात्र सीमित नराखी स्थानीय आर्थिक गतिविधिको प्रवर्द्धन, उद्यमशीलताको विकास, बचत परिचालन तथा उत्पादनशील क्षेत्रमा वित्तीय पहुँच विस्तार गर्ने महत्त्वपूर्ण माध्यमका रूपमा लिएको छ। बालुवाटार क्षेत्रमा नयाँ शाखा सञ्चालनमा आएसँगै व्यक्तिगत तथा संस्थागत ग्राहकहरूको आवश्यकता अनुरूपका वित्तीय सेवा उपलब्ध गराउन र स्थानीय आर्थिक गतिविधिहरूलाई थप चलायमान बनाउन सहयोग पुग्ने विश्वास बैंकले लिएको छ।
ISO 9001:2015 र 27001:2022 मान्यता प्राप्त गरिमा विकास बैंकले देशका सातै प्रदेशमा फैलिएको शाखा सञ्जालमार्फत विभिन्न भौगोलिक क्षेत्रका करिब १० लाख ग्राहकहरूलाई सेवा प्रदान गर्दै आइरहेको छ।
