काठमाडौँ। नेपाल टेलिकमले आफ्नो एनटी फाइबर (FTTH) मार्फत उपलब्ध गराइरहेको एनटीटिभी (NTTV) सेवामा स्मार्ट टिभी प्रयोगकर्ताहरूका लागि ‘भर्चुअल सेट-टप बक्स’ (Virtual Set-Top Box) सेवा सञ्चालनमा ल्याएको छ। यससँगै अब ग्राहकहरूले भौतिक सेट-टप बक्स (STB) बिना नै आफ्नो स्मार्ट टिभीमा टेलिभिजन सेवा प्रयोग गर्न सक्नेछन्।
नेपाल टेलिकमले २०८१ असोज १५ गतेदेखि हालका लागि एन्ड्रोइड टिभी प्रयोगकर्ताहरूलाई लक्षित गर्दै यो भर्चुअल सेट-टप बक्स सुविधा उपलब्ध गराएको जनाएको छ।
एन्ड्रोइड प्रणालीमा आधारित स्मार्ट टिभी प्रयोगकर्ताहरूले गुगल प्ले स्टोर (Google Play Store) मा गएर ‘स्मार्ट एनटीटिभी’ (Smart NTTV) एप सर्च गरी इन्स्टल गरेपछि यो सेवा सहजै प्रयोग गर्न सक्नेछन्। नजिकैको भविष्यमा अन्य सबै प्रकारका स्मार्ट टिभीहरूमा समेत चल्ने गरी यो सेवा विस्तार गर्ने तयारी भइरहेको टेलिकमले जनाएको छ।
- नयाँ प्याकेजमा रु. १,००० छुट: भर्चुअल सेट-टप बक्ससहितको नयाँ प्याकेज लिने ग्राहकहरूलाई रु. १,००० (एक हजार) छुटको व्यवस्था गरिएको छ।
- थप सुविधा: टेलिकमले एनटी फाइबरको एउटै तारबाट टेलिफोन, तीव्र गतिको इन्टरनेट र टेलिभिजन सेवा प्रदान गर्दै आएको छ। भर्चुअल सेट-टप बक्सका लागि विभिन्न वार्षिक तथा दुई वर्षिय प्याकेजहरू उपलब्ध छन्, जसमा मोबाइल डाटाको सुविधासमेत समावेश गरिएको छ।
यस सम्बन्धी थप विस्तृत जानकारी नेपाल टेलिकमको आधिकारिक वेबसाइट तथा ‘नेपाल टेलिकम’ (Nepal Telecom) एपमार्फत प्राप्त गर्न सकिनेछ।
