काठमाडौँ । कामना सेवा विकास बैंक लिमिटेडको २० औँ वार्षिक साधारण सभा बुधबार, आम्रपाली व्यान्केटमा शेयरधनीहरुको उल्लेख्य सहभागितामा भब्य रुपमा सम्पन्न भएको छ।
बैंकको बीसौं वार्षिक साधारणसभामा बैंकका अध्यक्ष सुदिप आचार्यले समीक्षा अवधिमा बैंकले उच्च संस्थागत सुशासन, वित्तीय अनुपालना र गुणस्तरीय व्यवसाय विस्तार गर्दै सेयरधनीहरूलाई दोहोरो अंकको आकर्षक प्रतिफल दिन सफल भएको बताउनु भयो। सभालाई सम्बोधन गर्दै अध्यक्ष आचार्यले आर्थिक वर्ष २०८२/०८३ को सञ्चित मुनाफाबाट सेयरधनीहरूलाई १५ प्रतिशत (करसहित) नगद लाभांश र अग्राधिकार सेयरधनीहरूलाई अनुपातिक रूपमा ९ प्रतिशत नगद लाभांश दिने निर्णय पारित गरेको छ।
अध्यक्ष आचार्यका अनुसार समग्र बैंकिङ क्षेत्रमा अधिक तरलता र कर्जाको मागमा कमी आएको कठिन परिस्थितिका बाबजुद बैंकको कार्यसम्पादन सन्तोषजनक रहेको छ। राष्ट्रिय स्तरका विकास बैंकहरूको कर्जा विस्तार ५.५० प्रतिशतमा सीमित हुँदा कामना सेवाले ६.२९ प्रतिशतको कर्जा वृद्धि हासिल गरेको छ।
साधारणसभामा प्रस्तुत गरिएका बैंकका प्रमुख वित्तीय तथा संस्थागत उपलब्धिहरू निम्न बमोजिम छन्:
- गुणस्तरीय कर्जा र निष्क्रिय कर्जा नियन्त्रण: समग्र बैंकिङ क्षेत्रको निष्क्रिय कर्जा (NPA) ५.६० प्रतिशत पुगेको अवस्थामा बैंकले आफ्नो एनपीए ३.७८ प्रतिशतमा सीमित राख्न सफल भएको छ।
- वित्तीय अनुपालना र अन्तर्राष्ट्रिय सम्मान: वित्तीय विवरणको पारदर्शिता र समयमै साधारणसभा सम्पन्न गरेबापत बैंकले आईक्यान (ICAN) द्वारा प्रदान गरिने ‘गोल्ड अवार्ड’ तथा दक्षिण एसियाली निकाय ‘साफा’ (SAFA) अवार्ड निरन्तर प्राप्त गर्दै आएको छ।
- राजस्व तथा सामाजिक उत्तरदायित्वमा योगदान: बैंकले स्रोतमा करकट्टी र आम्दानीमार्फत सरकारी राजस्वमा रु. ६८ करोड ७३ लाख २९ हजार १२१ र संस्थागत सामाजिक उत्तरदायित्व (CSR) अन्तर्गत रु. ७१ लाख १ हजार १ योगदान गरेको छ।
- रणनीति २०८४ र ग्राहक आधार: बैंकले तय गरेको ‘रणनीति २०८४’ लाई आधार मानी हाल ८ लाखभन्दा बढी ग्राहकहरूलाई अत्याधुनिक एवं विवेकशील बैंकिङ सेवा प्रदान गर्दै आएको छ।
अध्यक्ष सुदिप आचार्यले बैंकलाई यो उचाइमा पुऱ्याउन सहयोग गर्ने नियामक निकायहरू (नेपाल राष्ट्र बैंक, धितोपत्र बोर्ड, कम्पनी रजिष्ट्रार), सेयरधनी, ग्राहक, सञ्चालक समिति तथा सम्पूर्ण कर्मठ कर्मचारीहरूलाई विशेष धन्यवाद व्यक्त गर्नुभएको थियो।
