काठमाडौं, भदौ ११ । भदौ १० गते बिहान भोटेकोशी नदीमा आएको भीषण बाढीका कारण रसुवा, नुवाकोट, धादिङ, गोरखा र चितवन जिल्लामा भएको ठूलो मानवीय तथा भौतिक क्षतिप्रति नाडा अटोमोबाइल्स एसोसिएसन अफ नेपालले गहिरो दुःख व्यक्त गरेको छ।
नाडाले प्राकृतिक विपद्का कारण ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना र घाइतेहरूको शीघ्र स्वास्थ्यलाभको कामना गरेको छ। विपद्को यस घडीमा राज्यसँग काँधमा काँध मिलाएर उद्धार तथा राहत कार्यमा उभिनु सम्पूर्ण नागरिकको कर्तव्य रहेको जनाउँदै नाडाले नेपालका सम्पूर्ण अटोमोबाइल व्यवसायीहरूलाई एकबद्ध भई सहयोग गर्न आह्वान गरेको छ।
विशेष गरी, सम्माननीय प्रधानमन्त्री बालेन्द्र शाह र माननीय गृहमन्त्री सुदन गुरुङको पहल, आपतकालीन सूचना प्रवाह तथा उद्धार व्यवस्थापनप्रति नाडाले उच्च कदर व्यक्त गरेको छ। सरकारी आह्वानअनुरूप नाडाले तत्काल राहत तथा पुनरुत्थानका लागि ‘प्रधानमन्त्री दैवी प्रकोप राहत कोष’मा रु. १० लाख (दश लाख रुपैयाँ) आर्थिक सहयोग पठाउने निर्णय गरेको छ।
यसैबीच, यो महाविपद् राजधानीको भृकुटीमण्डपमा ‘नाडा अटो शो २०२६’ सञ्चालन भइरहेकै बेला परेको भए तापनि देशको आर्थिक गतिविधिलाई चलायमान राख्दै विपद्सँग जुध्नुपर्ने दायित्व रहेकाले प्रदर्शनी निरन्तर जारी रहने नाडाका अध्यक्ष सुरेन्द्रकुमार उप्रेतीले जानकारी दिनुभएको छ।
