काठमाडौं — नेपालले पहिलोपटक राष्ट्रिय टोलीसहित पिकलबल वर्ल्ड कप २०२६ मा सहभागिता जनाउने भएको छ। भियतनामको दा नाङमा आयोजना हुने यस विश्वकपमा ६४ देशका खेलाडीहरूसँगै नेपाली राष्ट्रिय टोलीले विश्व मञ्चमा देशको नाम अंकित गर्ने ऐतिहासिक अवसर प्राप्त गरेको छ।
विश्वकप आगामी ३० अगस्टदेखि ६ सेप्टेम्बर २०२६ सम्म सञ्चालन हुनेछ।
विश्वकपको समूह चरणमा नेपालले ओपन र सिनियर दुवै क्याटागोरीमा कठिन तथा प्रतिस्पर्धात्मक टोलीहरूसँग भिडन्त गर्नेछ:
- ओपन क्याटागोरी (Open Category): नेपाल, अष्ट्रेलिया, बेल्जियम र केन्या
- सिनियर क्याटागोरी (Senior Category): नेपाल, दक्षिण अफ्रिका, भारत र जर्मनी
विश्वकपको तयारीका क्रममा नेपाली राष्ट्रिय टोलीका खेलाडीहरूले देखाएको मेहनत, अनुशासन, समर्पण र टोली भावना प्रशंसनीय रहेको छ। यो सहभागिता केवल प्रतिस्पर्धा मात्र नभई विश्व समुदायसामु नेपालको खेल क्षमता, प्रतिभा र राष्ट्रिय गौरव प्रस्तुत गर्ने महत्त्वपूर्ण अवसर भएको पिकलबल एसोसियसन नेपालले जनाएको छ। खेलाडीहरूको उत्कृष्ट प्रदर्शनका आधारमा नेपाली टोली पदकविहीन नफर्किने दरो विश्वास एसोसियसनले व्यक्त गरेको छ।
नेपाली राष्ट्रिय टोलीको यस अन्तर्राष्ट्रिय यात्रामा सरकारी, निजी क्षेत्र र खेलकर्मीबिचको सहकार्य उत्कृष्ट उदाहरणका रूपमा अघि बढेको छ। टोलीलाई सफल बनाउन सहयोग पुर्याउने सम्पूर्ण प्रायोजक तथा साझेदारहरूप्रति पिकलबल एसोसियसन नेपालले हार्दिक आभार व्यक्त गरेको छ।
- मुख्य प्रायोजक: बाम बाम हाइड्रेशन ड्रिंक्स (Bam Bam Hydration Drinks)
- प्रायोजक तथा साझेदारहरू: करेन्ट नूडल्स, गोर्खा एस्थेटिक्स (GA), माछापुच्छ्रे बैंक, हलिडे इन एक्सप्रेस होटल, BCN हलिडेज, अरिन अस्पताल, G-स्पोर्ट्स, प्रभु बैंक, ABC सेक्युरिटीज, क्रेगीबर्न, तथा अमेरिका निवासी पिकलबलप्रेमी श्री प्रतीक जोशी।
पिकलबल एसोसियसन नेपालका अध्यक्ष सौरव भण्डारीका अनुसार राष्ट्रिय टोलीको यो सहभागिता विगत ५ वर्षदेखिको निरन्तर प्रयास, खेलाडीहरूको मेहनत, प्रशिक्षकहरूको समर्पण, अभिभावकको साथ र प्रायोजकहरूको सहयोगको प्रतिफल हो।
यदि नेपाल सरकार, राष्ट्रिय खेलकुद परिषद्, स्थानीय तह, निजी क्षेत्र र सम्बन्धित सरोकारवाला निकायहरूले समयमै आवश्यक नीति निर्माण, खेल पूर्वाधार विकास, प्रशिक्षण र सहजीकरणमा ध्यान दिन सके नेपाललाई अन्तर्राष्ट्रिय पिकलबलको महत्त्वपूर्ण केन्द्र (Hub) का रूपमा स्थापित गर्न सकिने विश्वास राखिएको छ।
