काठमाडौं, भदौ ५ — ‘एचपी ल्युब्रिकेन्ट्स प्रिजेन्ट्स १८औं नाडा अटो शो २०२६’ आगामी भदौ ९ गतेदेखि काठमाडौंको भृकुटीमण्डपमा सुरु हुने भएको छ। करिब तीन लाख वर्गफिट क्षेत्रफलमा सञ्चालन हुने यस वर्षको प्रदर्शनीमा २०० भन्दा बढी स्टलहरू रहनेछन्।
यस पटकको नाडा अटो शोमा ५३ सवारी ब्राण्डहरूले सहभागिता जनाउनेछन्, जसमा २३ यात्रुवाहक, १७ हल्का व्यावसायिक र १३ दुईपाङ्ग्रे ब्राण्डहरू समावेश छन्। प्रदर्शनीमा जापानी, भारतीय, कोरियाली, युरोपेली, मलेसियाली र चिनियाँ मूलका सवारीसाधनहरू एकै ठाउँमा अवलोकन गर्न सकिनेछ।
सवारीसाधन मात्र होइन, स्पेयर पार्ट्स र वित्तीय संस्थाको पनि ठूलो उपस्थिति
सवारी ब्राण्डको बाहुल्य देखिए तापनि प्रदर्शनीको ठूलो हिस्सा भने सवारीसाधन नबेच्ने अन्य सहयोगी उद्योगहरूले ओगटेका छन्।
- अटो कम्पोनेन्ट्स र ग्यारेज उपकरण: करिब ७० भन्दा बढी कम्पनीहरूले टायर, ब्याट्री, इन्जिन आयल, हेलमेट, बेयरिङ, ग्यास्केट, फिल्टर, डाइग्नोस्टिक उपकरण, ग्यारेज टुल्स, जीपीएस, एसेसरिज र इभी चार्जिङ उपकरणहरू प्रदर्शन गर्नेछन्।
- वित्तीय तथा बीमा सेवा: करिब १० बैंक, वित्तीय संस्था र बीमा कम्पनीहरूले विशेष गरी विद्युतीय सवारी (EV) का लागि आकर्षक वित्तीय योजना, अटो लोन र सवारी बीमा सुविधाहरू उपलब्ध गराउनेछन्।
प्रदर्शनीलाई व्यवस्थित बनाउन चारपाङ्ग्रे, दुईपाङ्ग्रे, वित्तीय संस्था, अटो पार्ट्स र ग्यारेज उपकरण गरी छुट्टाछुट्टै क्षेत्रमा विभाजन गरिएको छ। साथै, विदेशी सहभागीका लागि ‘इन्टरनेसनल बिजनेस प्याभिलियन’ र स्वदेशी उत्पादन तथा एसेम्बलीका लागि ‘मेड इन नेपाल / मेड फर नेपाल’ प्याभिलियनको व्यवस्था गरिएको छ।
नाडेका अध्यक्ष सुरेन्द्र कुमार उप्रेतीका अनुसार, अटो शो केवल नयाँ गाडीको प्रदर्शनी मात्र नभएर ती गाडीलाई वर्षौंसम्म सञ्चालनमा राखिराख्ने सम्पूर्ण अटोमोबाइल उद्योगको साझा मञ्च हो। पचास वर्षअघि एउटा कोठामा सीमित नेपालको अटोमोबाइल क्षेत्र आज तीन लाख वर्गफिटमा विस्तार हुनुले समग्र उद्योगकै तीव्र विकासलाई दर्शाउँछ।
