काठमाडौं । माउन्टेन इनर्जी लिमिटेडको सहायक कम्पनीमार्फत मनाङमा निर्माण हुन लागेको ६५ मेगावाट क्षमताको दूधखोला जलविद्युत आयोजनाको वित्तीय व्यवस्थापन सम्पन्न भएको छ।
आयोजना प्रवर्द्धक दूधखोला हाइड्रोपावर कम्पनी प्रालि र बैंकहरूबीच वित्तीय व्यवस्थापनसम्बन्धी सम्झौता भएपछि आयोजनालाई आवश्यक ऋण लगानी जुटेको हो
सम्झौताअनुसार आयोजनामा एनएमबि बैंकले ६ अर्ब ८१ करोड रुपैयाँ र सानिमा बैंकले ३ अर्ब २० करोड रुपैयाँ ऋण लगानी गर्नेछन्। एनएमबि बैंक आयोजनाको नेतृत्वकर्ता बैंक (लिड बैंक) र सानिमा बैंक सहायक बैंकका रूपमा रहनेछन्। दुवै बैंकले गरी आयोजनामा कुल १० अर्ब १ करोड रुपैयाँ लगानी गर्ने भएका छन्।
आयोजनाको कुल अनुमानित लागत १२ अर्ब ८९ करोड रुपैयाँ रहेको छ। यसअनुसार आयोजनाको प्रतिमेगावाट लागत करिब १९ करोड ८३ लाख रुपैयाँ पर्न आउँछ। कुल लागतमध्ये बैंकबाट प्राप्त हुने ऋणबाहेकको रकम प्रवर्द्धक कम्पनीले लगानी गर्नेछ।
वित्तीय व्यवस्थापन सम्पन्न भएसँगै आयोजना निर्माणको काम तत्काल सुरु गर्ने तयारी कम्पनीको छ। निर्माण सुरु भएको तीन वर्षभित्र विद्युत् उत्पादन सुरु गर्ने लक्ष्य राखिएको छ।
माउन्टेन इनर्जीले यसअघि निर्माण सम्पन्न गरेका ४२ मेगावाटको मिस्ट्रीखोला जलविद्युत आयोजना र ५ मेगावाटको ताँदीखोला जलविद्युत आयोजनाबाट नियमित रूपमा विद्युत् उत्पादन भइरहेको जनाएको छ।
