काठमाडौं । नेपाल वैदेशिक रोजगार व्यवसायी संघको विशेष साधारणसभा तथा निर्वाचनको मिति नजिकिएसँगै नयाँ नेतृत्व चयनको सरगर्मी तीव्र बनेको छ। यही जेठ २४ गते हुने निर्वाचनका लागि व्यवसायीहरूको स्वतन्त्र समूहले अध्यक्ष पदका उम्मेदवारसहित आफ्नो बलियो प्यानल घोषणा गर्ने भएको छ।
स्वतन्त्र व्यवसायीहरूको तर्फबाट एकता समाज सामाखुशीका अध्यक्ष तथा संघका पूर्व उपाध्यक्ष हरिबहादुर पाण्डेको नेतृत्वमा चुनावी प्यानल घोषणा हुन लागेको हो। प्यानलको औपचारिक घोषणा आज साँझ सुकेधारास्थित ल्याविस गार्डेनमा आयोजना हुने एक विशेष कार्यक्रममार्फत गरिने जनाइएको छ।
राजनीतिक प्रभावमुक्त संघ हाम्रो मुख्य एजेण्डा: पाण्डे
अध्यक्षका उम्मेदवार हरिबहादुर पाण्डेले वैदेशिक रोजगार क्षेत्रका व्यवसायीहरूको साझा हित र पेशागत सुरक्षालाई केन्द्रमा राखेर आफूहरू निर्वाचन मैदानमा उत्रिएको बताएका छन्। रोजगार मञ्चसँग कुराकानी गर्दै उनले विगतमा संघ व्यवसायीको हकहितभन्दा राजनीतिक प्रभाव र दलीय भ्रातृ संगठनहरूको स्वार्थबाट बढी ग्रसित भएको आरोप लगाए।
“संघ व्यवसायीहरूको साझा संस्था हो। तर विगतमा नेतृत्वमा पुगेकाहरू व्यवसायीको पक्षमा भन्दा राजनीतिक संगठनहरूको प्रभावमा बढी देखिए। त्यसले व्यवसायीका वास्तविक समस्या ओझेलमा परे। अब हामी व्यवसायीको हकहित, व्यवसायको संरक्षण र संस्थागत सुधारलाई केन्द्रमा राखेर अगाडि बढ्न चाहन्छौं,” पाण्डेले स्पष्ट पारे।
उनले आफू हाल कुनै पनि राजनीतिक दलसँग आबद्ध नरहेको उल्लेख गर्दै स्वतन्त्र सोच भएका व्यवसायीहरूलाई एकताबद्ध गरेर संघलाई नयाँ दिशातर्फ लैजाने दाबी गरे।
स्वतन्त्र समूहका मुख्य प्रतिबद्धताहरू:
- संघलाई पूर्ण रूपमा राजनीतिक प्रभावबाट मुक्त गर्ने।
- व्यवसायीहरूको पेशागत अधिकार र व्यवसायको सुरक्षा सुनिश्चित गर्ने।
- श्रम गन्तव्य मुलुकहरूसँगको सम्बन्ध विस्तार र मागपत्र प्रमाणीकरण प्रक्रियालाई पारदर्शी एवं संस्थागत बनाउने।
- व्यवसायीमैत्री नीति निर्माणका लागि राज्यका निकायहरूसँग सशक्त पैरवी गर्ने।
- संघको गुमेको गरिमा र प्रतिष्ठालाई पुनःस्थापना गर्ने।
त्रिपक्षीय सहकार्यमा शक्तिशाली प्यानल
यो स्वतन्त्र प्यानल व्यवसायीहरूको समूह एकता समिति, गणतान्त्रिक व्यवसायी तथा एकीकृत व्यवसायी समूहबीचको बलियो सहकार्यबाट निर्माण भएको बताइएको छ। समूहले संघमा राजनीतिक ध्रुवीकरणको अन्त्य गर्दै व्यावसायिक एकता र संस्थागत सुदृढीकरणलाई मुख्य प्राथमिकतामा राखेको छ।
हालसम्म तय भएका मुख्य उम्मेदवारहरू:
- अध्यक्ष: हरिबहादुर पाण्डे
- प्रथम उपाध्यक्ष: सञ्जु गुरुङ
- तृतीय उपाध्यक्ष: जब्बर अली मियाँ
- महासचिव: नूर मोहम्मद मियाँ
- कोषाध्यक्ष: बिनिता कटुवाल
(द्वितीय उपाध्यक्ष, सचिव तथा सदस्य पदका उम्मेदवारहरूको अन्तिम टुंगो लाग्न बाँकी रहेको र आजै साँझसम्म घोषणा गरिने समूहले जनाएको छ।)
त्रिपक्षीय भिडन्तको सम्भावना
स्वतन्त्र समूहको आगमनसँगै संघको चुनावी प्रतिस्पर्धा रोचक बन्ने देखिएको छ। नेतृत्वका लागि अन्य राजनीतिक निकट समूहहरू पनि सक्रिय छन्। चुनावी मैदानमा लोकतान्त्रिक वैदेशिक रोजगार एसोसिएसन र प्रगतिशील वैदेशिक रोजगार मञ्चले पनि आफ्नो छुट्टै प्यानलसहित उत्रिने तयारी तीव्र पारेका छन्।
विशेष परिस्थितिमा हुन लागेको संघको यो निर्वाचनलाई व्यवसायीहरूले संस्थाको भविष्य र अस्तित्व निर्धारण गर्ने महत्त्वपूर्ण अवसरका रूपमा लिएका छन्। वैदेशिक रोजगार क्षेत्रमा विद्यमान वर्तमान चुनौतीहरूलाई चिर्दै सक्षम, सशक्त र व्यवसायीमैत्री नेतृत्व चयन गर्नुपर्ने दबाब चौतर्फी रूपमा बढेको छ।
