काठमाडौँ, जेठ १२ । वरिष्ठ मुटुरोग विशेषज्ञ डा. भगवान कोइरालाको विशेष पहल र सपनाको परियोजनाका रूपमा रहेको काठमाडौँ बाल अस्पताल (काठमाडौँ इन्स्टिच्युट अफ चाइल्ड हेल्थ) को विधिवत् उद्घाटन गरिएको छ।
डा. कोइराला, भवन निर्माणमा मुख्य सहयोग पुर्याउने प्रतिष्ठित व्यवसायी मीनबहादुर गुरुङ र जगद्गुरु शङ्कराचार्य विधुशेखर भारतीको गरिमामय उपस्थितिमा अस्पतालको उद्घाटन गरिएको हो। काठमाडौँको बुढानीलकण्ठ–७, हेपाली हाइटमा रहेको उक्त अस्पतालले गत फागुन महिनादेखि नै चौबिसै घण्टा आकस्मिक सेवा उपलब्ध गराउँदै आएको थियो।
१०० रुपैयाँमै बहिरङ्ग सेवा, गरिब तथा विपन्न परिवारलाई राहत
आर्थिक अवस्था कमजोर भएका परिवारका बालबालिकालाई लक्षित गरी सञ्चालनमा ल्याइएको यस अस्पतालमा मात्र १०० रुपैयाँको बहिरङ्ग (ओपिडी) टिकटमार्फत सबै प्रकारका बाल रोग सम्बन्धी विशेषज्ञ परामर्श लिन पाइने व्यवस्था गरिएको छ। यस्तै, अस्पतालले मात्र ५०० रुपैयाँमा आकस्मिक सेवा उपलब्ध गराउने जनाएको छ।
बहु-विशिष्टीकृत सेवा र ‘केन्द्र तथा शाखा’ प्रणाली
सन् २०१७ मा एक नाफारहित संस्थाका रूपमा स्थापना भएको यस संस्थाले विशेषगरी बाल मुटुरोग, बाल क्यान्सर र बाल मानसिक स्वास्थ्यसहित बालबालिकाका सम्पूर्ण स्वास्थ्य समस्याहरूको एकीकृत र विशिष्टीकृत उपचार गर्ने लक्ष्य राखेको छ।
‘केन्द्र तथा शाखा’ हब एन्ड स्पोक प्रणालीमा आधारित यस संस्थाको काठमाडौँको बुढानीलकण्ठस्थित यो अस्पताल मुख्य केन्द्रका रूपमा रहनेछ भने भविष्यमा देशका विभिन्न ६ प्रदेशका ग्रामीण स्थानमा शाखा स्थापना गर्ने लक्ष्य लिइएको छ। यस सञ्जालमार्फत देशका कुना-काप्चाका हजारौँ नेपाली बालबालिकालाई गुणस्तरीय र सुलभ स्वास्थ्य सेवा पुर्याउने संस्थाको दीर्घकालीन उद्देश्य छ।
