काठमाडौँ / नर्सरी व्यवसायी संघ नेपालले तेस्रो नेशनल हर्टिकल्चर एक्स्पो आयोजना गर्ने भएको छ । नर्सरी क्षेत्रको एकीकृत महाकुम्भ मेलाको रूपमा हरेक बर्ष आयोजना गरिदैँ आएको उक्त मेला चैत्र १९ गते बिहीबारदेखि २३ गते सोमबारसम्म काठमाडौँको भृकुटिमण्डपमा हुने भएको हो ।
पुष्प, फलफूल, कृषिवन तथा जडिबुटी नर्सरीका व्यवसायिक उत्पादनहरूको वृहत प्रदर्शनीले आर्थिक मन्दीका कारण सुस्ताएको अर्थतन्त्रको हरित विकासमा सहयोग पुग्ने आयोजकको भनाइ छ ।
कृषि क्षेत्रमा लगानी गरेर रोजगारी सिर्जना गर्ने सपना देखिरहेको उद्यमी व्यवसायी तथा जिज्ञासु साथै अध्ययन अनुसन्धानमा संलग्न व्यक्तिहरूलाईसमेत प्रदर्शनीले सहयोग पुर्याउने संघका वरिष्ठ उपाध्यक्ष तथा मेला संयोजक रबिन कुमार गौतमले बताए ।
उनका अनुसार मेलामा सम्भव भए सम्म देशभरिबाट पुष्प नर्सरी, फलफूल नर्सरी, कृषि वन नर्सरी तथा जडिबुटी नर्सरीको ७०० भन्दा बढि प्रजातीका बोटविरुवाहरू प्रदर्शनी तथा बिक्री वितरणको लागि राखिनेछ ।
साथै मलखाद, अर्गानिक एवं रासायनिक विषादी, बिउ विजन, गमला, औजार उपकरण तथा प्रविधिहरूको समेत स्टल रहने छ । मेलामा ५६ वटा व्यवसायिक स्टल, २ वटा फुड स्टल, ३ वटा अफिसियल स्टल तथा प्रतिष्पर्धाको ४ वटा स्टल समेत जम्मा ६५ वटा स्टल रहने छ ।
संयोजक गौतमले भने, “नर्सरी व्यवसाय गर्न चाहने नव उद्यमी, जिज्ञाशु एवं अध्ययन अध्यापन साथै अनुसन्धान गर्ने सम्पूर्णको लागि यस मेला बृहत साझा मञ्च हुने हामीले विश्वास लिएका छौँ। यस मेलामा कम्तीमा ५१ हजार अवलोकन कर्ताले अवलोकन गर्ने साथै १ करोड ५० लाख भन्दा बढीको आर्थिक कारोवार हुने अपेक्षा गरेका छौँ।”
मेला अवलोकन गर्न सर्वसाधारणको लागि प्रवेश शुल्क प्रतिव्यक्ति एक सय रुपैयाँ र विद्यार्थीहरू र जेष्ठ नागरिकको लागि प्रतिव्यक्ति ५० रुपैयाँ रहेको उनले जानकारी दिए । प्रदर्शनीमा नर्सरी व्यवसायीहरुको क्षमता विकासका लागि स्वस्थ प्रतिस्पर्धा गराई व्यवसायीहरूको हौसला बढाउन्न शिल्ड, नगद तथा प्रमाणपत्रद्वारा पुरस्कृत गरिने संघले जानकारी दिएको छ ।
प्रतिस्पर्धाको मूल्याङ्कन गर्न कृषि बागबानी विज्ञ, वनस्पती विज्ञ, साथै माटो तथा पर्यावरण विज्ञसहितको संलग्नतामा ३ सदस्यीय मूल्याङ्गन समिति गठन गरिएको संयोजक गौतमले बताए । एक्स्पोको अवसरमा लामो समयदेखि निरन्तर नर्सरी व्यवसाय गरि यस क्षेत्रको विकासमा टेवा पुर्याउने व्यवसायीहरू मध्यबाट एक जनालाई ‘दीर्घकालीन क्रियाशिल नर्सरी व्यवसायी सम्मान’द्वारा सम्मान गरिने बताइएको छ ।
त्यस्तै, उनका अनुसार नर्सरीसँग सम्बन्धित वस्तु स्वदेश मै उत्पादन गरि आत्मनिर्भर बनाउन व्यवसायीहरुलाई उत्प्रेरित गर्न नर्सरी व्यवसायी मध्यबाट १ जनालाई ‘वर्षको विशेष उत्पादनमुखी नर्सरी व्यवसायी सम्मान’द्वारा सम्मान गरिनेछ ।
“नेपालको कृषि क्षेत्रको उन्नयनको लागि कलम चलाइ कृषकको आबाज बुलन्द गर्न क्रियाशिल कृषि सञ्चारकर्मीहरूमध्य २ जनालाई दोसल्ला, नगद तथा प्रमाणपत्रद्वारा उद्घाटन समारोहका प्रमुख अथितिबाट सम्मान गरिने कार्यक्रम रहेको छ,” उनले भने, “संस्थाको यस कदमबाट कृषि र कृषकको लागि निश्वार्थ योगदान गर्नु हुने सञ्चार क्षेत्रसँगको सहकार्य तथा सहयात्रामा अझ प्रगाढता हुने अपेक्षा गरेका छौँ ।”
नर्सरी व्यवसायी सङ्घ, नेपालको आयोजनामा हुन गइरहेको दोस्रो नेशनल हर्टिकल्चर एक्स्पो-२०८२ को सह-आयोजक संस्थाहरू पुष्प विकास केन्द्र, वनस्पती विभाग, कृषि तथा पशुपंक्षी विकास मन्त्रालय, कृषि विभाग, पुल्चोक, राष्ट्रिय फलफूल विकास केन्द्र किर्तिपुर, कृषि तथा पशुपंक्षी विकास मन्त्रालय बागमती प्रदेश रहेको छ भने सहयोगी संस्था ए।जि।ए एग्रो, कुमारी फ्लोरा फार्म, गौतम नर्सरी, फ्लोरिकल्चर सहकारि संस्था र ग्रिस्मा नर्सरी साथै मेला स्थल सजावटको लागि उदय गार्डेन सेन्टर प्रा.लि. र एभरेष्ट फ्लोरिकल्बर एण्ड भेजिटेवलं फार्म रहेको रहेको छ ।
नर्सरी व्यवसायको विकास र विस्तार, स्वच्छ वातावरणसहित आय र रोजगार प्रबर्द्धन गरी देशभरि छरिएर रहेका समग्र नर्सरी, पुष्प, फलफूल, कृषि वन तथा जडिबुटी नर्सरी व्यवसायीहरूको हकहित र व्यवसायिक क्षमताको अभिवृद्धि गरी व्यवस्थित गर्ने उद्देश्यले २०८० असोज १५ गते नर्सरी व्यवसायी संघको स्थापना गरिएको हो ।
संघको आयोजनामा नेपालको ५ वटा एक्स्पो सम्पन्न भइसकेको छ ।
यसैगरी संघले नर्सरी बाटिका, वृक्षारोपण तथा रक्तदान कार्यक्रम जस्ता सामाजिक कार्य समेत योगदान पुर्याउँदै आएको छ ।
संघका अनुसार नेपालमा पुष्पको नर्सरी ७ सय ५१, फलफूलको ५ सय ५०, कृषि वनको २ हजार २ सय, जडिबुटीको ४ सय गरी कुल ३ हजार ९०१ नर्सरी रहेको छ । तथ्याङ्क अनुसार ११.८३ अर्बको लगानी रहेको नर्सरी क्षेत्रबाट बार्षिक ६.४३ अर्बको आर्थिक कारोबार हुने संघले जनाएको छ ।
नर्सरी व्यवसायबाट अप्रत्यक्ष प्रत्यक्ष रूपमा करिब १ लाख २० हजारले रोजगारी प्राप्त गरिरहेको संघले जानकारी दिएको छ ।
